തിരുവനന്തപുരം > സംസ്ഥാനത്ത് കോവിഡ് വാക്സിനേഷൻ ഒന്നാം ഡോസ് 91 ശതമാനം എത്തിയ സാഹചര്യത്തിൽ കൂടുതൽ ഇളവുകൾ പ്രഖ്യാപിച്ച് സർക്കാർ. ഹോട്ടലുകളിലും ബാറുകളിലും ഇരുന്ന് കഴിക്കാൻ അനുവാദം നൽകുകയാണെന്ന് മുഖ്യമന്ത്രി പിണറായി വിജയൻ അറിയിച്ചു. രണ്ട് ഡോസ് വാക്സിൻ സ്വീകരിച്ചവർക്കാണ് പ്രവേശനത്തിന് അനുമതി. ജീവനക്കാർ രണ്ട് ഡോസ് വാക്സിൻ എടുത്തവരായിരിക്കണം. കഴിക്കാന് എത്തുന്നവര്ക്കുള്ള വാക്സിനേഷന് നിബന്ധന 18 വയസ്സിന് താഴെയുള്ളവര്ക്ക് ബാധകമല്ല. സീറ്റിംഗ് കപ്പാസിറ്റിയുടെ 50 ശതമാനം മാത്രമേ അനുവദിക്കൂ. എ.സി പ്രവർത്തിപ്പിക്കാൻ പാടില്ലെന്നും മുഖ്യമന്ത്രി പറഞ്ഞു.
ഇന്ഡോര് സ്റ്റേഡിയങ്ങള്, നീന്തല് കുളങ്ങള് എന്നിവയുടെ പ്രവര്ത്തനവും രണ്ടു ഡോസ് വാക്സിനേഷന് സ്വീകരിച്ച തൊഴിലാളികളെ ഉള്പ്പെടുത്തി, രണ്ടു ഡോസ് വാക്സിനേഷന് സ്വീകരിച്ച ആളുകള്ക്കായി അനുവദിക്കാവുന്നതാണ്. കോവിഡ് പ്രോട്ടോകോള് പാലിച്ചു കൊണ്ടായിരിക്കണം പ്രവര്ത്തനം. നിയന്ത്രണങ്ങളുടെ ഭാഗമായി ഏർപ്പെടുത്തിയിരുന്ന, പുറത്തിറങ്ങാനുള്ള നിബന്ധനകൾ ഒഴിവാക്കി. വാക്സിൻ സർട്ടിഫിക്കറ്റ്, ആർട്ടിപിസിആർ, രോഗമുക്തി സർട്ടിഫിക്കറ്റ് എന്നിവ ഇനി ആവശ്യമില്ല.
സ്കൂളുകളും കോളേജുകളും ഏതാനും ആഴ്ചകള്ക്കുളളില് തുറക്കുന്ന സാഹചര്യത്തില് വിദ്യാര്ത്ഥികളുടെ സുരക്ഷ ഉറപ്പാക്കുന്നതിന് പ്രത്യേക പദ്ധതി തയ്യാറാക്കാന് വിദ്യാഭ്യാസ, ആരോഗ്യ വകുപ്പുകൾക്ക് പുറമേ സംസ്ഥാന പോലീസ് മേധാവിക്കും നിര്ദ്ദേശം നല്കിയിട്ടുണ്ട്.
എല്ലാ സ്റ്റേഷന് ഹൗസ് ഓഫീസര്മാരും തങ്ങളുടെ പ്രദേശത്തെ സ്കൂളുകളിലെ പ്രഥമാധ്യാപകരുടെയും സ്കൂള് മാനേജ്മെന്റ് പ്രതിനിധികളുടെയും യോഗം വിളിച്ചുകൂട്ടി കുട്ടികളുടെ സുരക്ഷയും ആരോഗ്യവുമായി ബന്ധപ്പെട്ട കാര്യങ്ങള് ചര്ച്ച ചെയ്യും. കുട്ടികളെ കൊണ്ടുവരുന്ന സ്കൂള് വാഹനങ്ങളുടെ പ്രവര്ത്തനക്ഷമത ഉറപ്പുവരുത്തേണ്ടതിന്റെ ഉത്തരവാദിത്തം പൊലീസിന് ആയിരിക്കും. ഇക്കാര്യത്തില് മോട്ടോര്വാഹന വകുപ്പിന്റെ സഹായവും തേടാവുന്നതാണ്.
സ്കൂള് വാഹനങ്ങളുടെ അറ്റകുറ്റപ്പണികള് ഒക്ടോബര് 20 ന് മുമ്പ് പൂര്ത്തിയാക്കണം. കുട്ടികളെ കൊണ്ടുവരുന്നത് സ്വകാര്യവാഹനങ്ങള് ആയാലും സ്കൂള് വാഹനങ്ങള് ആയാലും അവ ഓടിക്കുന്നവര്ക്ക് പത്തുവര്ഷത്തെ പ്രവര്ത്തന പരിചയം ഉണ്ടാകണം. എല്ലാ വിദ്യാലയങ്ങളിലും ഒരു അധ്യാപകനെ സ്കൂള് സേഫ്റ്റി ഓഫീസറായി നിയോഗിക്കണം. ഇക്കാര്യങ്ങള് നടപ്പിലാക്കുന്നുണ്ടോയെന്ന് സ്റ്റേഷന് ഹൗസ് ഓഫീസര്മാര് സ്കൂളിലെത്തി പരിശോധിക്കണമെന്നും നിര്ദ്ദേശം നല്കി.
അടച്ചിട്ട മുറികളിലും ഹാളുകളിലും ഉള്ള യോഗങ്ങള് പലയിടത്തും നടക്കുകയാണ്. അത് ഒഴിവാക്കാനാകണം. അധ്യാപക രക്ഷാകര്തൃ സമിതിയോടൊപ്പം തദ്ദേശസ്വയംഭരണം, വിദ്യാഭ്യാസ വകുപ്പുകളുടെ കൂടെ പ്രാഥമിക ആരോഗ്യ കേന്ദ്രങ്ങളിലെ ആരോഗ്യപ്രവര്ത്തകരെയും പങ്കെടുപ്പിച്ച് സൂക്ഷ്മതല ആസൂത്രണം സ്കൂള് തുറക്കുന്നതിനു മുന്നേ നടത്തേണ്ടതാണ്.
കുട്ടികളില് കോവിഡ് വരാനുള്ള സാധ്യത താരതമ്യേന കുറവാണ്. എന്നാലും കുറച്ച് കുട്ടികള്ക്കെങ്കിലും കോവിഡ് വരാനുള്ള സാധ്യത തള്ളിക്കളയാനാവില്ല. അത് മുന്കൂട്ടി കണ്ടുകൊണ്ടുള്ള പ്രവര്ത്തനങ്ങള് നടത്തണം. അതുകൊണ്ടാണ് ഇതുമായി ബന്ധപ്പെട്ട എല്ലാവരും വാക്സിനേഷൻ നടത്തണമെന്ന് പറയുന്നത്. അത് മാത്രമല്ല അവർ മറ്റ് കൂടുതൽ ആളുകളുമായി ബന്ധപ്പെടാതെ ഇരിക്കുകയും വേണം. സ്കൂൾ പിടിഎകൾ അതിവേഗത്തിൽ പുനസംഘടിപ്പിക്കണം.
ദേശാഭിമാനി വാർത്തകൾ ഇപ്പോള് വാട്സാപ്പിലും ടെലഗ്രാമിലും ലഭ്യമാണ്.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..