പുനര്‍ജനി നൂഴലിനെത്തിയവർക്ക് കടന്നൽ ആക്രമണം

തിരുവില്വാമല

പുനർജനി നൂഴാനെത്തിയ  10 പേരെയും കാണാനെത്തിയ ഒരു വയോധികയെയും കടന്നലുകൾ കുത്തിപ്പരിക്കേൽപ്പിച്ചു. പുനർജനി മലയുടെ മുകളിൽ സീതാർക്കുണ്ടിന് സമീപത്ത് പോയിരുന്നവർക്കാണ് കുത്തേറ്റത്. കുത്തേറ്റവർ പ്രാണരക്ഷാർഥം വയോധികയുടെ അടുത്തെത്തിയപ്പോഴാണ് വയോധികയെയും കുത്തിയത്. മണിമല സ്വദേശിനി ചന്ദ്രിക , കുന്നംകുളം സ്വദേശികളായ രാജേഷ് , രഞ്ജീഷ് , വിബീഷ് , വിഷ്ണു , അജീഷ് , ജിതേഷ്, കൊടുങ്ങല്ലൂർ സ്വദേശികളായ വിജയ കൃഷ്ണൻ, ബൈജു, സുമേഷ് , സഞ്ജീവൻ എന്നിവരെയാണ് കടന്നൽ കൂട്ടം ആക്രമിച്ചത്. ഉടുമുണ്ട് കൊണ്ട് ശരീരം മുഴുവൻ പുതച്ചു കൊണ്ടാണ് ഇവർ കടന്നൽ ആക്രമണത്തിൽ നിന്നും രക്ഷപ്പെട്ടത്. കൂടാതെ മലയുടെ മുകളിൽ നിന്ന സന്നദ്ധപ്രവർത്തകർ പുല്ല് കത്തിച്ച് പുകച്ചും കടന്നലുകളെ തുരത്തി. പഴയന്നൂർ പൊലീസ്, വനപാലകർ, സന്നദ്ധപ്രവർത്തകർ, അ​ഗ്നിശമനസേനാവിഭാ​ഗം തുടങ്ങിയവരും രക്ഷാപ്രവർത്തനത്തിന് നേതൃത്വം നൽകി.