ശബരിമല സീസൺ: മികച്ച 
കലക്ഷനുമായി എരുമേലി ഡിപ്പോ

കാഞ്ഞിരപ്പള്ളി

ശബരിമല സീസൺ ആദ്യ പത്തുദിവസം കഴിയുമ്പോൾ എരുമേലി കെഎസ്ആർടിസി ഡിപ്പോയുടെ വരുമാനം 22.48 ലക്ഷം. എരുമേലി ഡിപ്പോയുടെ ചരിത്രത്തിലെ ഉയർന്ന കലക്ഷനാണിത്. എരുമേലിയിൽനിന്ന്‌ പമ്പയിലേക്ക് നടത്തിയ 300 ലേറെ സർവീസുകളിൽ നിന്നാണ് ഈ വരുമാനം ലഭിച്ചത്.

  നിലവിൽ 10 ബസുകളാണ് പമ്പ സർവീസിനായി ഈ ഡിപ്പോയിൽ എത്തിച്ചിട്ടുള്ളത്. തീർഥാടകത്തിരക്ക് വർധിക്കുന്നതോടെ ഈ ആഴ്ച അവസാനം അഞ്ചു ബസുകൾ കൂടി സർവീസ്‌ നടത്തും. പമ്പാ സർവീസിനായി 40 ജീവനക്കാരും എരുമേലിയിലെത്തിയിട്ടുണ്ട്. നിലവിൽ വർക്ക്ഷോപ്പ് വാഹനവും എത്തിയിട്ടുണ്ട്. അധികമായി എത്തുന്ന കെഎസ്ആർടിസി ബസുകൾക്ക് പാർക്ക് ചെയ്യാൻ എരുമേലി പഞ്ചായത്ത് സ്വകാര്യഭൂമി വാടകയ്ക്ക് എടുത്തു നൽകിയിട്ടുണ്ട്.