കളമശേരി
കോൺഗ്രസ് ഭരണം നിലനിർത്താൻ അവസരവാദ നിലപാടെടുത്ത് വോട്ടെടുപ്പിൽനിന്ന് ബിജെപി കൗൺസിലർ വിട്ടുനിന്നതോടെ കളമശേരി നഗരസഭാ അധ്യക്ഷയ്‌ക്കെതിരെ ഇടതുപക്ഷം കൊണ്ടുവന്ന അവിശ്വാസപ്രമേയം പരാജയപ്പെട്ടു. യുഡിഎഫ് സ്വതന്ത്രൻ കെ എച്ച് സുബൈർ ഉൾപ്പെടെ ഒപ്പിട്ട് നഗരസഭാ അധ്യക്ഷയ്ക്കും ഉപാധ്യക്ഷയ്ക്കുമെതിരെ രണ്ട് അവിശ്വാസപ്രമേയങ്ങൾ നൽകിയിരുന്നു. അധ്യക്ഷയ്‌ക്കെതിരെയുള്ള പ്രമേയമാണ് തിങ്കളാഴ്ച ചർച്ചചെയ്ത് വോട്ടിനിട്ടത്. ചൊവ്വാഴ്ച ഉപാധ്യക്ഷയ്‌ക്കെതിരെയുള്ള പ്രമേയം ചർച്ചയ്‌ക്കെടുക്കും.
യുഡിഎഫ് സ്വതന്ത്രൻ ഉൾപ്പെടെ ഇടതുപക്ഷത്തുള്ള 21 അംഗങ്ങൾ സഭയിലെത്തി. 20 അംഗങ്ങളുള്ള യുഡിഎഫിൽനിന്ന് ജമാൽ മണക്കാടൻമാത്രമാണ് സഭയിലെത്തിയത്. ഏക ബിജെപി അംഗം പ്രമോദ് തൃക്കാക്കരയും അവിശ്വാസപ്രമേയ ചർച്ചയ്‌ക്ക് എത്തി. വോട്ടെടുപ്പ് ആരംഭിക്കുമ്പോൾ ജമാൽ മണക്കാടനൊപ്പം പ്രമോദ് തൃക്കാക്കര സഭയിൽനിന്ന് ഇറങ്ങിപ്പോയി.
ലീഗിലെയും കോൺഗ്രസിലെയും കൗൺസിലർമാർക്ക് യോഗത്തിൽനിന്ന് വിട്ടുനിൽക്കണമെന്നാവശ്യപ്പെട്ട് വിപ്പ് നൽകിയിരുന്നു. എന്നാൽ, യുഡിഎഫിൽനിന്ന് ജമാൽ മണക്കാടൻമാത്രം യോഗത്തിൽ പങ്കെടുത്തത് ബിജെപി അംഗമായ പ്രമോദ് വോട്ടെടുപ്പിൽ പങ്കെടുക്കുന്നത് തടയാനാണെന്ന് എൽഡിഎഫ് ആരോപിച്ചു.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
