പോരായ്മകളുടെ തിരുത്തൽ ശക്തിയാകണം: എ വിജയരാഘവൻ
പാറശാല മോദി ഭരണത്തിലൂടെ തീവ്രവർഗീയത വൻസന്നാഹങ്ങളോടെ നമ്മുടെ നാടിനെ പിന്നോട്ടുവലിക്കുകയാണെന്ന് സിപിഐ എം സംസ്ഥാന സെക്രട്ടറിയുടെ ചുമതല വഹിക്കുന്ന എ വിജയരാഘവൻ. സ്വാതന്ത്ര്യസമരത്തിൽ ഒരുപങ്കും വഹിക്കാത്ത സംഘപരിവാറിന്റെ കൈകളിലെത്തിയ ഇന്ത്യ ഇന്ന് വർഗീയ വിദ്വേഷ രാഷ്ട്രീയത്തിലേക്ക്‌ എത്തി. കോൺഗ്രസിന്റെ ദൗർബല്യമാണ് ഇതിലേക്ക് നയിച്ചത്. ഇത്തരം പോരായ്മകളുടെ തിരുത്തൽശക്തികളായി നാം മാറണമെന്ന് അദ്ദേഹം കൂട്ടിച്ചേർത്തു. സിപിഐ എം പാറശാല ഏരിയ സമ്മേളന സമാപനത്തോട്‌ അനുബന്ധിച്ച് വെർച്വൽ പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. സമൂഹതാൽപ്പര്യത്തിനുവേണ്ടി പാർടി ഏറ്റെടുക്കുന്ന പ്രവൃത്തികളെ ജനം നെഞ്ചോട് ചേർക്കുന്നുണ്ടെങ്കിലും വികസനത്തെ തകർക്കുന്ന നിലപാടാണ് പ്രതിപക്ഷത്തിന്റേതെന്നും അദ്ദേഹം കൂട്ടിച്ചേർത്തു. ഏരിയ കമ്മിറ്റിയംഗം കടകുളം ശശി അധ്യക്ഷനായി. ഏരിയ സെക്രട്ടറി എസ് അജയകുമാർ, ഏരിയ കമ്മിറ്റിയംഗങ്ങൾ, പാർടി അംഗങ്ങൾ, വർഗ ബഹുജന സംഘടനാ പ്രവർത്തകർ ഉൾപ്പെടെ നൂറുകണക്കിനാളുകൾ വെബിനാറിൽ പങ്കെടുത്തു. Read on deshabhimani.com