‘ഒരു കോടി’ സല്യൂട്ട്
വടകര ഓണം ബമ്പറിലെ രണ്ടാം സമ്മാനമായ ഒരു കോടി രൂപ വടകരയിലെ അഞ്ച് പൊലീസുകാർക്ക്. റൂറൽ എസ്‌പി ഓഫീസിലെ സിവിൽ പൊലീസ് ഓഫീസർമാരായ വൈശാഖ്, ദിജേഷ്, അജിത്ത്, ചന്ദ്രൻ, രമേശൻ എന്നിവർ ചേർന്നെടുത്ത ടിസി 537460 നമ്പർ ടിക്കറ്റിനാണ് സമ്മാനം ലഭിച്ചത്. ടിക്കറ്റ് കേരള ഗ്രാമീൺ ബാങ്കിന്റെ മേപ്പയ്യൂർ ശാഖയിൽ എൽപ്പിച്ചു. റൂറൽ ജില്ലാ പൊലീസ് ഓഫീസിൽ സ്ഥിരമായി ലോട്ടറി വിൽപ്പന നടത്താറുള്ള സന്തോഷിൽനിന്നാണ് ഇവർ ടിക്കറ്റെടുത്തത്. പൊലീസുകാരായ ഇവർക്ക് വിൽപ്പനക്കാരനെ സഹായിക്കുക എന്നതായിരുന്നു ലക്ഷ്യം. ജീവിത പ്രയാസമനുഭവിക്കുന്ന സന്തോഷിനുവേണ്ടി ഇവർ പലതവണ ടിക്കറ്റെടുത്ത് സഹായിച്ചിരുന്നു. സമ്മാനങ്ങളൊന്നും കിട്ടിയിരുന്നില്ല. എന്നാൽ ഇത്തവണ അഞ്ചുപേരും ചേർന്ന് ഓണം ബമ്പറിന്റെ അഞ്ച് ടിക്കറ്റുകളെടുത്തു. അതിൽ ഒന്നിനാണ് ഭാഗ്യം കടാക്ഷിച്ചത്. നറുക്കെടുപ്പിൽ രണ്ടാം സമ്മാനമായ ഒരു കോടി ലഭിച്ച വിവരവും സന്തോഷ് തന്നെയാണ് ഇവരെ വിളിച്ചറിയിച്ചത്. വൈശാഖ്, ദിജേഷ്, അജിത്ത് എന്നിവർ സ്പെഷ്യൽ ബ്രാഞ്ചിലാണ് ജോലിചെയ്യുന്നത്. ചന്ദ്രൻ, രമേശൻ എന്നിവർ പൊലീസിലെ ഡ്രൈവർ തസ്തികയിലും. Read on deshabhimani.com