മൂഴിക്കൽ–-മെഡിക്കൽ കോളേജ്‌ പൈപ്പ്‌ ലൈൻ റോഡ്‌ അടയ്‌ക്കരുത്‌
കോഴിക്കോട്‌ മൂഴിക്കൽ–-മെഡിക്കൽ കോളേജ്‌ പൈപ്പ്‌ ലൈൻ റോഡ്‌ അടയ്‌ക്കാനുള്ള നീക്കത്തിൽനിന്ന്‌ ഗവ. മെഡിക്കൽ കോളേജ്‌ അധികൃതർ പിൻവാങ്ങണമെന്ന്‌ റോഡ്‌ സംരക്ഷണ സമിതി ഭാരവാഹികൾ വാർത്താസമ്മേളനത്തിൽ ആവശ്യപ്പെട്ടു. കക്കോടി, കുരുവട്ടൂർ, പാലത്ത്‌ ഭാഗങ്ങളിൽനിന്നുള്ളവർ കാലങ്ങളായി ഉപയോഗിക്കുന്ന വഴിയാണിത്‌. മെഡിക്കൽ കോളേജ്‌ ക്യാമ്പസ്‌ ഒറ്റ മതിൽക്കെട്ടിനുള്ളിലാക്കാനാണ്‌ ഈ റോഡ്‌ കെമിക്കൽ എക്‌സാമിനേഷൻ ലാബിന്‌ സമീപം അടയ്‌ക്കുന്നതെന്നാണ്‌ അധികൃതർ പറയുന്നത്‌. കഴിഞ്ഞ ദിവസം റോഡ്‌ അടയ്‌ക്കാനുള്ള നീക്കം ജനപ്രതിനിധികൾ ഇടപെട്ടാണ്‌ തടഞ്ഞത്‌. ക്യാമ്പസിന്‌ മതിൽ കെട്ടുന്നതിൽ എതിർപ്പില്ലെന്നും എന്നാൽ റോഡ്‌ അടയ്‌ക്കുന്നത്‌ അംഗീകരിക്കാനാവിലെന്നും ജനറൽ കൺവീനർ എം എ ജോൺസൺ പറഞ്ഞു. ചില ഉദ്യോഗസ്ഥർ ജനതാൽപ്പര്യത്തിന്‌ വിരുദ്ധമായി എടുക്കുന്ന തീരുമാനമാണ്‌ ഇതിനുപിന്നിൽ. സംരക്ഷണ സമിതി അംഗങ്ങളായ ബൈജു മേരിക്കുന്ന്‌, മാസിൻ റഹ്‌മാൻ, പി ടി സന്തോഷ്‌ കുമാർ, കെ പി റജീഷ്‌ എന്നിവരും വാർത്താസമ്മേളനത്തിൽ പങ്കെടുത്തു. Read on deshabhimani.com