ഒ എൻ വി പുരസ്കാരം എം മുകുന്ദന്
കൊല്ലം മാസ് ആർട്സ് സർവീസ് സൊസൈറ്റി ആഭിമുഖ്യത്തിൽ ഒ എൻ വി മലയാളം പഠനകേന്ദ്രം ലൈബ്രറി ഏർപ്പെടുത്തിയ 2019ലെ ഒ എൻ വി പുരസ്കാരത്തിന് സാഹിത്യകാരൻ എം മുകുന്ദൻ അർഹനായി. എം മുകുന്ദന്റെ ‘നൃത്തം ചെയ്യുന്ന കുടകൾ’ നോവലിനാണ്‌ അവാർഡ്‌. ഒരു ലക്ഷം രൂപയും പ്രശസ്തിപത്രവും ചിത്രകാരൻ ആശ്രാമം സന്തോഷ് രൂപകൽപ്പന ചെയ്ത ഫലകവുമടങ്ങിയ പുരസ്കാരം വെള്ളിയാഴ്ച ധനമന്ത്രി കെ എൻ ബാലഗോപാൽ സമ്മാനിക്കും. കൊല്ലം സോപാനം കലാകേന്ദ്രത്തിൽ വൈകിട്ട് അഞ്ചിനാണ്‌ ചടങ്ങ്‌. മാസ് പ്രസിഡന്റ് എക്സ് ഏണസ്റ്റ് അധ്യക്ഷനാകും. ഒ എൻ വിയുടെ മകൻ രാജീവ് ഒ എൻ വി, കൊച്ചുമകൾ അപർണാ രാജീവ്, ആശ്രാമം ഉണ്ണിക്കൃഷ്ണൻ, അജിത, ഷാജി എന്നിവരുടെ നേതൃത്വത്തിൽ ഒ എൻ വിയുടെ ഗാനങ്ങൾ കോർത്തിണക്കിയ ഗാനാർച്ചന നടക്കും. അശോകൻ ചരുവിൽ, കെ പി നന്ദകുമാർ, ഡോ. സി ഉണ്ണിക്കൃഷ്ണൻ എന്നിവരടങ്ങിയ ജൂറിയാണ് പുരസ്കാരം നിർണയിച്ചത്. 2018ൽ പ്രഥമ ഒ എൻ വി പുരസ്കാരം ലഭിച്ചത് കവി കുരീപ്പുഴ ശ്രീകുമാറിനായിരുന്നു. കോവിഡ് സാഹചര്യത്തിലാണ് രണ്ടാമത്തെ പുരസ്കാരവിതരണം വൈകിയത്. വാർത്താസമ്മേളനത്തിൽ മാസ് പ്രസിഡന്റ് എക്സ് ഏണസ്റ്റ്, സെക്രട്ടറി എ റഷീദ്, അശോകൻ ചരുവിൽ, ഡോ. സി ഉണ്ണിക്കൃഷ്ണൻ, രാധ കാക്കനാടൻ എന്നിവർ പങ്കെടുത്തു. Read on deshabhimani.com