സാന്ത്വന സന്ദേശവുമായി അധ്യാപികയുടെ വിരമിക്കല്‍
മാവേലിക്കര വിരമിക്കൽ ചടങ്ങിൽ കിടപ്പുരോഗികൾക്ക് പാലിയേറ്റീവ് ഉപകരണങ്ങൾ വിതരണം ചെയ്ത്‌ അധ്യാപിക. വഴുവാടി ചാങ്കൂർ പടീറ്റതിൽ ജി കെ ഷീലയാണ് വിരമിക്കൽ മാതൃകാപരമാക്കിയത്. ഓക്‌സിജൻ സിലിൻഡറുകളും ഡയാലിസിസ് കിറ്റുകളും വീൽചെയറുകളും ഗ്യാസ് സ്റ്റൗവുകളും അടങ്ങുന്ന പാലിയേറ്റീവ് ഉപകരണങ്ങൾ അഭയം പെയിൻ ആൻഡ് പാലിയേറ്റീവ് കെയർ സൊസൈറ്റിക്കാണ് ടീച്ചർ കൈമാറിയത്. 22 വർഷം ചെട്ടികുളങ്ങര ഈരേഴ യുപിഎസിൽ ഇംഗ്ലീഷ് അധ്യാപികയായി പ്രവർത്തിച്ചു. ആറുമാസമായി മാവേലിക്കര ബിആർസിയിൽ ക്ലസ്റ്റർ കോ-–-ഓർഡിനേറ്ററാണ്. മാവേലിക്കര ബ്ലോക്ക് പഞ്ചായത്ത് സ്ഥിരംസമിതി അധ്യക്ഷയും മഹിളാ അസോസിയേഷൻ തഴക്കര മേഖലാ പ്രസിഡന്റുമായ ഷീല ടീച്ചറുടെ അധ്യാപനജീവിതം അവസാനിക്കുന്നത് വെള്ളിയാഴ്ചയാണ്. അഭയം പെയിൻ ആൻഡ് പാലിയേറ്റീവ് കെയർ സൊസൈറ്റി തഴക്കര മേഖലാ കമ്മിറ്റി തഴക്കര സംസ്‌കൃതം യുപി സ്‌കൂളിലാണ് ചടങ്ങ് സംഘടിപ്പിച്ചത്. എം എസ് അരുൺകുമാർ എംഎൽഎ ഉദ്ഘാടനംചെയ്തു. സൊസൈറ്റി മേഖലാ ചെയർപേഴ്‌സൺ ഡോ.പി കെ സുലോചന അധ്യക്ഷയായി. അഭയം ഏരിയ ചെയർമാൻ ജി ഹരിശങ്കർ ഓക്‌സിജൻ സിലിണ്ടറുകളും ഡയാലിസിസ് കിറ്റുകളും ട്രഷറർ കെ മധുസൂദനൻ വീൽചെയറുകളും വൈസ് ചെയർമാൻ മുരളി തഴക്കര ഗ്യാസ് അടുപ്പുകളും ഏറ്റുവാങ്ങി. മാവേലിക്കര ബ്ലോക്ക് പഞ്ചായത്ത് പ്രസിഡന്റ് എൻ ഇന്ദിരാദാസ്, തഴക്കര പഞ്ചായത്ത് പ്രസിഡന്റ് ഷീബ സതീഷ്, വൈസ് പ്രസിഡന്റ് അംബിക സത്യനേശൻ, ഡോ.സാബു സുഗതൻ, മുരളീധരൻ തഴക്കര, സി പി രാജ്കുമാർ എന്നിവർ സംസാരിച്ചു. അഭയം കൺവീനർ എസ് ശ്രീകുമാർ സ്വാഗതവും കെ രഘുപ്രസാദ് നന്ദിയും പറഞ്ഞു. Read on deshabhimani.com