ഹയർ സെക്കൻഡറിയിൽ 79.46 %
ആലപ്പുഴ ജില്ലയിൽ ഹയർസെക്കൻഡറി പരീക്ഷയിൽ ഇക്കുറി 79.46 ശതമാനം വിജയം. സംസ്ഥാനത്ത് പത്താം സ്ഥാനത്താണ് ജില്ല. 121 സ്കൂളുകളിലായി 22,065 കുട്ടികളാണ് പരീക്ഷയെഴുതിയത്. 17,532 പേർ ഉപരിപഠനത്തിന് അർഹതനേടി. 1328 പേർക്ക് മുഴുവൻ വിഷയങ്ങൾക്കും എപ്ലസ് ലഭിച്ചു. നാല് സ്കൂളുകൾ 100 ശതമാനം വിജയം നേടി. ഓപ്പൺ സ്കൂളിൽ 45.92 ശതമാനമാണ് വിജയം. പരീക്ഷയെഴുതിയ 956 പേരിൽ 439പേർ ഉപരിപഠനത്തിന് യോഗ്യത നേടി. 54 കുട്ടികൾ മുഴുവൻ വിഷയത്തിനും എപ്ലസ് നേടി. ടെക്നിക്കൽ സ്കൂളിൽ 67 ശതമാനമാണ് വിജയം. പരീക്ഷയെഴുതിയ 79പേരിൽ 53പേർ വിജയിച്ചു. വിഎച്ച്എസ്ഇയിൽ 76.75 ആണ് വിജയശതമാനം. വിഎച്ച്എസ്ഇ, ടെക്നിക്കൽ വിജയം കൂടി പ്ലസ്ടുവിൽ വിജയത്തിന് ജില്ലയിൽ തിളക്കം അൽപ്പം കുറഞ്ഞപ്പോൾ വിഎച്ച്എസ്ഇ, ടെക്നിക്കൽ വിഭാഗത്തിൽ ഇക്കുറി വിജയശതമാനം വർധിച്ചു. വിഎച്ച്എസ്ഇയിൽ വിജയ ശതമാനം 76.75. പരീക്ഷയെഴുതിയ 1514 കുട്ടികളിൽ 1162 പേർ ഉപരിപഠനത്തിന് യോഗ്യത നേടി. 74.71 ആയിരുന്നു കഴിഞ്ഞ തവണത്തെ ശതമാനം. ടെക്നിക്കലിൽ കഴിഞ്ഞ തവണത്തെ 62.96ൽനിന്ന് ഇക്കുറി 67 ആയി ഉയർന്നു. എന്നാൽ, മുഴുവൻ വിഷയത്തിനും ആർക്കും എ പ്ലസില്ല. എ പ്ലസിൽ കുറവ് ഹയർ സെക്കൻഡറി വിഭാഗം പരീക്ഷയിൽ ഇക്കുറി വിജയ ശതമാനത്തിലും എല്ലാ വിഷയത്തിനും എ പ്ലസ് നേടിയവരുടെ എണ്ണത്തിലും കുറവ്. കഴിഞ്ഞതവണ 84.18 ശതമാനമായിരുന്നു വിജയം. ഇത്തവണ 79.46. കുറവ് 4.72 ശതമാനം. 2020-ൽ വിജയ ശതമാനം 82.46 ഉം 2019-ൽ 80.29 ഉം. മുഴുവൻ എപ്ലസ് നേടിയവരുടെ എണ്ണത്തിൽ കാര്യമായ കുറവുണ്ട്. കഴിഞ്ഞതവണ 2,340 പേരായിരുന്നു. ഇത്തവണ 1328 പേരായി. 1,012 പേരുടെ കുറവ്. ഓപ്പൺസ്കൂൾ വിഭാഗത്തിലും വിജയ ശതമാനത്തിൽ കുറവുണ്ട്. കഴിഞ്ഞതവണ 50.82 ശതമാനമായിരുന്നു വിജയം. ഇക്കുറി 45.92. കുറവ് 4.9 ശതമാനം. എന്നാൽ മുഴുവൻ എ പ്ലസുകാരുടെ എണ്ണത്തിൽ വർധനയുണ്ട്. കഴിഞ്ഞ തവണത്തെ 35ൽനിന്നും ഇക്കുറി 54 ആയി ഉയർന്നു. 2020ൽ 12 പേർക്ക് മാത്രമായിരുന്നു ഈ നേട്ടം. Read on deshabhimani.com