കെപിവിയു സംസ്ഥാന സമ്മേളനം തുടങ്ങി കാഴ്‌ചയുടെ ജാലകം തുറന്ന്‌ ഫോട്ടോപ്രദർശനം
കാഞ്ഞങ്ങാട് കേരളാ ഫോട്ടോഗ്രാഫേഴ്സ് ആൻഡ് വീഡിയോഗ്രാഫേഴ്സ് യൂണിയൻ (സിഐടിയു) സംസ്ഥാന സമ്മേളനത്തിന്റെ ഭാഗമായി കാഞ്ഞങ്ങാട് ലുലു ടവറിൽ നടത്തിയ ട്രേഡ് ഫെയറും ഫോട്ടോ പ്രദർശനവും ജനങ്ങളെ ആകർഷിക്കുന്നു. വിവാഹ ഫോട്ടോഗ്രഫി രംഗത്ത് വിവാഹത്തിന് നൽകേണ്ട സമ്മാനങ്ങളുടെ വിവിധ മോഡലുകളും കല്യാണ ആൽബങ്ങളുമൊക്കെ പ്രവേശന കവാടത്തിൽ തന്നെ ഇടംപിടിച്ചു. വിലയേറിയ പുത്തൻ മോഡൽ കാമറകളും പുത്തൻ ട്രെൻഡുകളും പരിചയപ്പെടുത്തി. ഇൻഫ്രയിമിന്റെ ഫോട്ടോ പ്രദർശനത്തിൽ ആഗോള തലത്തിൽ പ്രശസ്തമായ ഫോട്ടോ മുതൽ സംഘടനയിലെ അംഗങ്ങളുടെ വരെ ഫോട്ടോകൾ അണിനിരന്നു. കെവിൻ കാർട്ടർ യുദ്ധമുഖത്ത് പകർത്തിയ കഴുകനും കുട്ടിയും, 1972ലെ യുദ്ധഭീകരത വ്യക്തമാക്കുന്ന നിക്ക് ഉട്ടിന്റെ ചിത്രവും ഫോട്ടോഗ്രാഫിയുടെ മഹത്തായ പാരമ്പര്യത്തിന്റെ തെളിവായി. ഫോട്ടോ പ്രദർശനം നഗരസഭാ ചെയർപേഴ്സൺ കെ വി സുജാത ഉദ്ഘാടനം ചെയ്തു. കെ പ്രിയേഷ് അധ്യക്ഷനായി. ഇൻഫ്രെയിം ഫോട്ടോ ക്ലബ്‌ പ്രദർശനം ശിൽപി ഉണ്ണി കാനായി ഉദ്ഘാടനം ചെയ്തു. എം രാഘവൻ എന്നിവർ സംസാരിച്ചു. പ്രദീപ് റയിൻ സ്വാഗതവും ലതീഷ് ലീഫ് നന്ദിയും പറഞ്ഞു. ട്രേഡ് ഫെയർ സിഐടിയു സംസ്ഥാന സെക്രട്ടറി ടി കെ രാജൻ ഉദ്ഘാടനം ചെയ്തു. പി കെ നിഷാന്ത് അധ്യക്ഷനായി. കെപിവിയു സംസ്ഥാന പ്രസിഡന്റ് വി ശശികുമാർ, സിഐടിയു സംസ്ഥാന കമ്മിറ്റി അംഗങ്ങളായ യു തമ്പാൻ നായർ, എ മാധവൻ എന്നിവർ സംസാരിച്ചു. ഹക്കീം മണ്ണാർക്കാട് സ്വാഗതവും പ്രസാദ് സ്നേഹ നന്ദിയും പറഞ്ഞു. Read on deshabhimani.com