31 January Tuesday

ലോകത്തിന്റെ പോക്ക് നാശത്തിലേക്ക്: യുഎൻ

വെബ് ഡെസ്‌ക്‌Updated: Tuesday Nov 8, 2022

കെയ്‌റോ> ലോകം കാലാവസ്ഥാ നരകത്തിലേക്കുള്ള വഴിയിലാണെന്ന്‌ യുഎൻ സെക്രട്ടറി ജനറൽ അന്റോണിയോ ഗുട്ടെറസ്‌. ഈജിപ്‌തിലെ ഷ്രം അൽഷെയ്‌ക്കിൽ നടക്കുന്ന ഐക്യരാഷ്‌ട്ര സംഘടനയുടെ 27–-ാമത്‌ വാർഷിക കാലാവസ്ഥ ഉച്ചകോടിയിൽ (സിഒപി) സംസാരിക്കുകയായിരുന്നു അദ്ദേഹം. തിരിച്ചുപിടിക്കാനാകാത്ത വിധം ആഗോളതാപനവും കാർബൺ ബഹിർഗമനവും കൂടുകയാണ്‌. നാശത്തിലേക്കാണ്‌ ലോകം സഞ്ചരിക്കുന്നതെന്നും ഇപ്പോഴും കാൽ ആക്‌സിലേറ്ററിലാണെന്നും അദ്ദേഹം പറഞ്ഞു.

ജൈവ ഇന്ധന കമ്പനികൾക്ക്‌ രാജ്യങ്ങൾ വൻ നികുതി ചുമത്തണമെന്നും പ്രകൃതിദുരന്തങ്ങളും  ദാരിദ്ര്യവും നേരിടുന്ന രാജ്യങ്ങൾക്ക്‌ ഈ തുക വീതിക്കണമെന്നും അദ്ദേഹം ആവശ്യപ്പെട്ടു. സഹകരിക്കുക അല്ലെങ്കിൽ നശിക്കുക എന്നതാണ്‌ മുന്നിലുള്ള വഴിയെന്നും അദ്ദേഹം പറഞ്ഞു.
പ്രതിജ്ഞകൾ മതിയാക്കി പ്രവൃത്തിക്കേണ്ട സമയമാണിതെന്ന്‌ ഉച്ചകോടിക്ക്‌ ആതിഥേയത്വം വഹിക്കുന്ന ഈജിപ്‌ത്‌ പ്രസിഡന്റ്‌ അബ്‌ദുൽ ഫത്ത അൽസിസി പറഞ്ഞു. ഏറ്റവും കൂടുതൽ മാലിന്യം പുറന്തള്ളുന്നവരാണ്‌ കാലാവസ്ഥാ പരിപാലനത്തിന്‌ കൂടുതൽ പണം ചെലവാക്കേണ്ടതെന്ന്‌ സെനഗൽ പ്രസിഡന്റും ആഫ്രിക്കൻ യൂണിയൻ പ്രസിഡന്റുമായ മക്കി സാൽ പറഞ്ഞു.

ബ്രിട്ടൻ, അമേരിക്ക, ഫ്രാൻസ്‌, ജോർദാൻ, യുഎഇ തുടങ്ങി വിവിധ രാജ്യങ്ങളിലെ ഭരണത്തവൻമാരും മുൻ ഭരണാധികാരികളും ഉച്ചകോടിയിൽ പങ്കെടുക്കുന്നുണ്ട്‌. ഇതിനിടെ, ഉച്ചകോടികൊണ്ട്‌ കാര്യമായ ഗുണമില്ലെന്ന വിമർശം രൂക്ഷമാണ്‌. ഉക്രയ്‌നിലെ റഷ്യയുടെ സൈനിക നടപടി മറയാക്കി പല രാജ്യങ്ങളും കാലാവസ്ഥാ പ്രവർത്തനത്തിനുള്ള തുക വെട്ടിക്കുറച്ചെന്നും വിമർശമുണ്ട്‌. ഉച്ചകോടി ‘ഗ്രീൻവാഷാ’ണെന്ന്‌ പരിസ്ഥിതിപ്രവർത്തക ഗ്രെറ്റ തുൻബർഗ്‌ പറഞ്ഞു.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..



മറ്റു വാർത്തകൾ

----
പ്രധാന വാർത്തകൾ
-----
-----
 Top