ന്യൂഡല്‍ഹി> ജർമൻ വാഹന നിര്‍മാതാക്കളായ ബിഎംഡബ്ല്യു രണ്ടാംതലമുറ ബിഎംഡബ്ല്യു എക്‌സ് 4 ഇന്ത്യയില്‍ പുറത്തിറക്കി. ചെന്നൈ ശാലയില്‍ നിന്നും ബിഎംഡബ്ല്യു പ്രാദേശികമായി നിര്‍മിക്കുന്ന പുതിയ X4 എസ്‌യുവി കൂപ്പെ പെട്രോള്‍, ഡീസല്‍ പതിപ്പുകളില്‍ വില്‍പ്പനയ്‌ക്കെത്തും. എക്‌സ്‌ഡ്രൈവ് 20d M സ്‌പോര്‍ട് X, എക്‌സ്‌ഡ്രൈവ് 30d M സ്‌പോര്‍ട് X എന്നിങ്ങനെ രണ്ടു ഡീസല്‍ വകഭേദങ്ങളുണ്ട് ഡീസല്‍ നിരയില്‍. എക്‌സ്‌ഡ്രൈവ് 30i M സ്‌പോര്‍ട് X മാത്രമെ പെട്രോള്‍ പതിപ്പായിട്ടുള്ളൂ. 60 ലക്ഷം രൂപ മുതലാണ് ഡല്‍ഹി എക്‌സ്‌ഷോറൂം വില. ഈ വര്‍ഷം ബിഎംഡബ്ല്യു ഇന്ത്യന്‍ വിപണിയിലേക്കെത്തിക്കുന്ന 12 വാഹനങ്ങളില്‍ ആദ്യത്തെതാണ് 2019 എക്‌സ് 4.
കമ്പനിയുടെ പുതിയ CLAR അടിത്തറയാണ് X4 പങ്കിടുന്നത്. 7 സീരീസിലൂടെ കമ്പനി തുടക്കമിട്ട CLAR പ്ലാറ്റ്‌ഫോം അടുത്തകാലത്തായി പുതിയ ബിഎംഡബ്ല്യു കാറുകള്‍ക്ക് മുഴുവന്‍ ഉപയോഗിക്കുകയാണ‌്. ഇതുമൂലം മുന്‍തലമുറ മോഡലിനെക്കാള്‍ 50 കിലോഗ്രാം ഭാരം കുറയ്ക്കാന്‍ എക്‌സ് 4-ന് സാധിച്ചു. 81 എംഎം നീളവും 37 എംഎം വീതിയും 54 എംഎം വീല്‍ബേസും രണ്ടാംതലമുറ എക്‌സ് 4-ന് കൂടുതലുണ്ട്. പിന്‍നിരയില്‍ 27 എംഎം ലെഗ്‌റൂം കൂടുതലായി ലഭിക്കും. ബൂട്ട് സ്‌പേസ് 25 ലിറ്ററോളം വര്‍ധിച്ചു.
ഡിസൈനില്‍ പുതുതലമുറ എക്‌സ് 3 മോഡലുകമായി ഏറെ സാമ്യമുണ്ട് എക്‌സ് 4-ന്. വലിയ 19 ഇഞ്ച് അലോയി വീല്‍, സൈഡ് സ്‌കേര്‍ട്ട്‌സ്, ഡ്യുവല്‍ എക്‌സ്‌ഹോസ്റ്റ്, റിയര്‍ ഡിഫ്യൂസര്‍, റൂഫ് മൗണ്ടഡ് സ്‌പോയിലര്‍ എന്നിവയടങ്ങിയ എം സ്‌പോര്‍ട്ട് എക്‌സ് ഡിസൈന്‍ പാക്കേജ് എക്‌സ് 4-ന് കരുത്തന്‍ പരിവേഷം നല്‍കും. പരിഷ്‌കരിച്ച 10.25 ഇഞ്ച് മള്‍ട്ടി ഫങ്ഷന്‍ ഇന്‍സ്ട്രുമെന്റ് ഡിസ്‌പ്ലേ അകത്തെ പ്രധാന മാറ്റങ്ങളിലൊന്നാണ്. ബിഎംഡബ്ല്യു ഡിസ്‌പ്ലേ കീ, ഹെഡ് അപ്പ് ഡിസ്‌പ്ലേ, 16 സ്പീക്കര്‍ ഹര്‍മന്‍ കാര്‍ഡന്‍ സറൗണ്ട് സൗണ്ട് സിസ്റ്റം, ബിഎംഡബ്ല്യു ഗസ്ച്ചര്‍ കണ്‍ട്രോള്‍, റിയര്‍വ്യൂ ക്യാമറ, പനോരമിക് സണ്‍റൂഫ്, അഡാപ്റ്റീവ് സസ്‌പെന്‍ഷന്‍, ഇലക്ട്രിക് ടെയില്‍ഗേറ്റ് എന്നിവയാണ് മറ്റു പ്രധാന ഫീച്ചേഴ്‌സ്.
248 ബിഎച്ച്പി പവറും 350 എന്‍എം ടോര്‍ക്കുമേകുന്നതാണ് പെട്രോള്‍ എന്‍ജിന്‍. 2.0 ലിറ്റര്‍ ഡീസല്‍ എന്‍ജിന്‍ 188 ബിഎച്ച്പി പവറും 400 എന്‍എം ടോര്‍ക്കുമേകുമ്പോള്‍ 3.0 ലിറ്റര്‍ ഡീസല്‍ 261 ബിഎച്ച്പി പവറും 620 എന്‍എം ടോര്‍ക്കും നല്‍കും. മൂന്നിലും 8 സ്പീഡ് ഓട്ടോമാറ്റിക്കമാണ് ട്രാന്‍സ്മിഷന്‍. സുരക്ഷയ്ക്കായി ആറ് എയര്‍ബാഗ്, എബിഎസ്, ഇബിഡി, ഐസോഫിക്‌സ് ചൈല്‍ഡ് സീറ്റ് മൗണ്ട്ഡ്, അറ്റെന്‍ന്റീവ്‌നെസ് അസിസ്റ്റ്, സ്റ്റെബിലിറ്റി കണ്‍ട്രോള്‍ തുടങ്ങിയ നിരവധി സുരക്ഷാ സന്നാഹങ്ങളും പുതിയ എക്‌സ് 4-ലുണ്ട്.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
