ഇനിയേസ്‌റ്റ ജപ്പാൻ വിടുന്നു ; 
കളി മതിയാക്കില്ല

ടോക്യോ
പ്രായം മുപ്പത്തൊമ്പതായിട്ടും ആന്ദ്രെ ഇനിയേസ്റ്റയ്‌ക്ക്‌ ഫുട്‌ബോൾ കളിച്ച്‌ മതിയാകുന്നില്ല. ജപ്പാൻ ക്ലബ്ബായ വിസെൽ കൊബെയിൽനിന്ന്‌ ഈ സീസണിൽ പടിയിറങ്ങുന്ന മുൻ സ്‌പാനിഷ്‌ മധ്യനിരക്കാരൻ കളി തുടരുമെന്ന്‌ പ്രഖ്യാപിച്ചു. 22 വർഷത്തെ ബാഴ്‌സലോണ കളിജീവിതത്തിനുശേഷം 2018ലാണ്‌ ഇനിയേസ്റ്റ വിസെൽ കൊബെയിൽ എത്തിയത്‌. ഇതുവരെ 133 തവണ കുപ്പായമണിഞ്ഞു.

ജൂലൈ ഒന്നിന്‌ അവസാന മത്സരം കളിക്കും. ഈ സീസണിൽ പകരക്കാരന്റെ വേഷത്തിലാണ്‌ കളത്തിലെത്തിയത്‌. അതും വെറും മൂന്ന്‌ മത്സരത്തിൽ. ‘കളി തുടരാനാണ്‌ താൽപ്പര്യം. വിരമിക്കാൻ സമയമായിട്ടില്ല. പുതിയ ഇടം തേടുകയാണ്‌’–-ഇനിയേസ്റ്റ പറഞ്ഞു. 2010 ലോകകപ്പിൽ സ്‌പെയ്‌നിന്റെ വിജയഗോൾ നേടിയ ഇനിയേസ്റ്റ 2018ൽ രാജ്യാന്തര മത്സരത്തിൽനിന്ന്‌ വിരമിച്ചിരുന്നു. ബാഴ്‌സയ്‌ക്കായി 674 കളിയിലിറങ്ങി. 32 ട്രോഫികൾ നേടി.

ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..