10 പഞ്ചായത്തും 2 നഗരസഭയും 
‘ഡി’ വിഭാഗത്തിൽ

കോവിഡ് വ്യാപനം നിയന്ത്രിക്കുന്നതിനായി ജില്ലയിൽ വ്യാഴാഴ്‌ച മുതൽ ഒരാഴ്‌ചത്തേക്ക്‌ പ്രാദേശികാടിസ്ഥാനത്തിൽ നടപ്പാക്കുന്ന നിയന്ത്രണങ്ങൾ പ്രഖ്യാപിച്ചു.  തദ്ദേശസ്ഥാപനങ്ങളെ എ, ബി, സി, ഡി എന്നിങ്ങനെ തിരിച്ചാണ് നിയന്ത്രണം. രോ​ഗസ്ഥിരീകരണ നിരക്ക് അഞ്ച് ശതമാനത്തിൽ താഴെയുള്ള പ്രദേശങ്ങൾ ‘എ’ യിലും അഞ്ചുമുതൽ 10 വരെ ‘ബി’യിലും 10 മുതൽ 15 വരെ ‘സി’ യിലും 15നുമുകളിൽ ‘ഡി’യിലുമാണ്‌. 10 പഞ്ചായത്ത്‌ ‘ഡി’ വിഭാ​ഗത്തിലാണ്. തിരുവനന്തപുരം കോർപറേഷനും ആറ്റിങ്ങൽ, നെയ്യാറ്റിൻകര നഗരസഭകളും ‘ബി’യിലും നെടുമങ്ങാട്‌, വർക്കല നഗരസഭകൾ ‘ഡി’ യിലുമാണ്‌. 

പഞ്ചായത്തുകൾ

ഡി വിഭാഗം: പുല്ലമ്പാറ, തൊളിക്കോട്, ചിറയിൻകീഴ്, കരവാരം, വക്കം, പുളിമാത്ത്, മടവൂർ, അഴൂർ, ഇടവ, മംഗലപുരം.

സി വിഭാഗം: വിളപ്പിൽ, നാവായിക്കുളം, മണമ്പൂർ, കടയ്ക്കാവൂർ, ആനാട്, കൊല്ലയിൽ, തിരുപുറം, പഴയകുന്നുമ്മേൽ, കിളിമാനൂർ, ചെമ്മരുതി, വെമ്പായം, പനവൂർ, പെരുങ്കടവിള, ഇലകമൺ, പള്ളിച്ചൽ, നെല്ലനാട്, കഠിനംകുളം, കുറ്റിച്ചൽ, അണ്ടൂർക്കോണം, വെള്ളനാട്, വിളവൂർക്കൽ, പൂവാർ, മുദാക്കൽ, പൂവച്ചൽ.

ബി വിഭാഗം: കോട്ടുകാൽ, ബാലരാമപുരം, നന്ദിയോട്, കിഴുവിലം, അതിയന്നൂർ, പാറശാല, കല്ലിയൂർ, കരകുളം, ഒറ്റശേഖരമംഗലം, പോത്തൻകോട്, വെട്ടൂർ, കാഞ്ഞിരംകുളം, കാട്ടാക്കട, വാമനപുരം, വെങ്ങാനൂർ, മാണിക്കൽ, വെള്ളറട, ചെറുന്നിയൂർ, അരുവിക്കര, മലയിൻകീഴ്, കരുംകുളം, കള്ളിക്കാട്, ചെങ്കൽ, വിതുര, മാറനല്ലൂർ, പള്ളിക്കൽ, നഗരൂർ, പെരിങ്ങമ്മല, പാങ്ങോട്, ഒറ്റൂർ. എ വിഭാഗം: കാരോട്, അമ്പൂരി, ആര്യങ്കോട്, ആര്യനാട്, കല്ലറ, കുന്നത്തുകാൽ, ഉഴമലയ്ക്കൽ, കുളത്തൂർ, അഞ്ചുതെങ്ങ്.

1101 പേർക്ക്‌ കൂടി കോവിഡ് 

ജില്ലയിൽ ബുധനാഴ്‌ച 1101 പേർക്ക്‌ കൂടി കോവിഡ് സ്ഥിരീകരിച്ചു. 1226 പേർ രോഗമുക്തരായി. 7.3 ശതമാനമാണ്‌ ടെസ്റ്റ് പോസിറ്റിവിറ്റി നിരക്ക്.  10,846 പേർ ചികിത്സയിലാണ്. 

991 പേർക്ക് സമ്പർക്കത്തിലൂടെയാണ്‌ രോഗബാധ. ഇതിൽ അഞ്ച്‌ പേർ ആരോഗ്യ പ്രവർത്തകരാണ്. പുതുതായി 2273 പേരെ നിരീക്ഷണത്തിലാക്കി.

നിരീക്ഷണത്തിലുള്ളവരുടെ ആകെ എണ്ണം 3,0873.