പത്തനംതിട്ട
ലഹരി മരുന്ന്‌ ഉപയോഗവും വിൽപ്പനയും തടയാൻ പൊലീസിന്റെ നേതൃത്വത്തിൽ നടത്തിയ പരിശോധന ഓപ്പറേഷൻ ഡി ഹണ്ടിൽ ജില്ലയിൽ നാല്‌ പേർ അറസ്റ്റിൽ.
ഡി ഹണ്ടിന്റെ ഭാഗമായി ഞായറാഴ്‌ച സംസ്ഥാന വ്യാപകമായി പൊലീസ്‌ മിന്നൽ പരിശോധന നടത്തിയിരുന്നു. ലഹരിയുമായി ബന്ധമുള്ള ആളുകളെ ഒരു മാസത്തോളം നിരീക്ഷിച്ച ശേഷമാണ്‌ പരിശോധന നടത്തിയത്‌. ജില്ലയിൽ വിവിധ ഭാഗങ്ങളിൽ നടത്തിയ പരിശോധനയിൽ എംഡിഎംഎ, കഞ്ചാവ്‌, ഹാൻസ്‌ എന്നിവ പിടികൂടി.
ഓപ്പറേഷൻ ഡി ഹണ്ടിന്റെ ഭാഗമായി ജില്ലയിൽ അഞ്ച്‌ പുതിയ കേസുകളാണ്‌ രജിസ്റ്റർ ചെയ്‌തത്‌. 26 പേരെ പരിശോധിച്ചു. 0.5 ഗ്രാം എംഡിഎംഎ, 14.33 ഗ്രാം കഞ്ചാവ്‌, 75 പാക്കറ്റ്‌ ഹാൻസ്‌, കഞ്ചാവ്‌ ബീഡി എന്നിവ പിടികൂടി. ലഹരി വിൽപ്പന നടത്തുന്നവരെ തുടർച്ചയായി നിരീക്ഷിച്ചാണ്‌ വിപണനം നടക്കുന്നുവെന്ന്‌ സംശയിക്കുന്നയിടങ്ങളിൽ പരിശോധന നടത്തിയത്‌. സംസ്ഥാനത്താകെ 1,373 പേരെ പൊലീസ്‌ പരിശോധിച്ചു. 246 കേസുകളിലായി 244 പേരെ അറസ്റ്റ് ചെയ്‌തു. 81.46 ഗ്രാം എംഡിഎംഎയും 10.352 കിലോ കഞ്ചാവും 5.63 ഗ്രാം ഹാഷിഷ്‌ ഓയിലും 0.105 ബ്രൗൺ ഷുഗറും പിടികൂടി.
സ്ഥിരം വിൽപ്പനക്കാരുടെ ഡേറ്റാ ബാങ്ക്‌ പൊലീസ്‌ തയ്യാറാക്കിയിരുന്നു. മയക്കുമരുന്ന്‌ കേസുകളിൽ ശിക്ഷയനുഭവിച്ചവരുമായി ബന്ധമുള്ള വ്യക്തികളെയും ഒരു മാസത്തോളം നിരീക്ഷിച്ച ശേഷമാണ്‌ പരിശോധന നടന്നത്‌. മയക്കുമരുന്ന്‌ ഇടപാട്‌ നടത്തുന്നവരുടെ വിവരങ്ങളടങ്ങിയ ഡേറ്റാ ബാങ്ക്‌ വിപുലപ്പെടുത്തി ഓപ്പറേഷൻ ഡി ഹണ്ട്‌ തുടർന്നും നടത്താനാണ്‌ തീരുമാനം. മയക്കുമരുന്ന്‌ വിപണനം സംബന്ധിച്ച്‌ പൊതുജനങ്ങൾക്ക്‌ വിവരം നൽകാൻ 24 മണിക്കൂറും ആന്റി നർകോട്ടിക്‌ കൺട്രോൾ റൂം പ്രവർത്തിക്കുന്നു. 9497927797 എന്ന നമ്പരിൽ വിളിക്കുന്നവരുടെ വിവരങ്ങൾ രഹസ്യമായി സൂക്ഷിക്കും.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
