അഴീക്കോടൻ രാഘവന്‌ 
സ്‌മരണാഞ്‌ജലി

തിരുവനന്തപുരം/പാലക്കാട്

കമ്യൂണിസ്റ്റ് പ്രസ്ഥാനത്തിന്റെ സമുന്നത നേതാവായിരുന്ന അഴീക്കോടൻ രാഘവന്റെ 51 –-ാം രക്തസാക്ഷിത്വദിനം സംസ്ഥാനമാകെ ആചരിച്ചു. സിപിഐ എം ഓഫീസുകളിലും പാർടി ഘടകങ്ങളിലും തൊഴിൽ കേന്ദ്രങ്ങളിലും പതാക ഉയർത്തിയശേഷം അനുസ്‌മരണയോഗം ചേർന്നു.   എ കെ ജി സെന്ററിൽ  കേന്ദ്ര കമ്മിറ്റി അംഗം എ കെ ബാലൻ പതാക ഉയർത്തി.    ദേശാഭിമാനി ആസ്ഥാനത്ത്‌ റസിഡന്റ്‌ എഡിറ്റർ വി ബി പരമേശ്വരൻ പതാക ഉയർത്തി.  

സിപിഐ എം പാലക്കാട് ജില്ലാ കമ്മിറ്റി ഓഫീസായ കുഞ്ഞിരാമൻ മാസ്റ്റർ സ്മാരക മന്ദിരത്തിൽ സംസ്ഥാന കമ്മിറ്റി അം​ഗം സി കെ രാജേന്ദ്രൻ പതാക ഉയർത്തി. ദേശാഭിമാനി പാലക്കാട് യൂണിറ്റിൽ ലോക്കൽ കമ്മിറ്റിയംഗം എസ് സിരോഷ പതാക ഉയർത്തി. പുഷ്പാർച്ചനയും നടന്നു.

കണ്ണൂർ പയ്യാമ്പലത്തെ സ്‌മൃതിമണ്ഡപത്തിൽ രാവിലെ സിപിഐ എം  നേതാക്കളും പ്രവർത്തകരും പുഷ്പാർച്ചന നടത്തി. ജില്ലാ സെക്രട്ടറി എം വി ജയരാജൻ അനുസ്‌മരണ പ്രഭാഷണം നടത്തി.   അഴീക്കോടൻ കുത്തേറ്റുവീണ തൃശൂർ ചെട്ടിയങ്ങാടിയിലെ സ്മൃതി മണ്ഡപത്തിൽ നൂറുകണക്കിന് പാർടി പ്രവർത്തകർ   പുഷ്പാർച്ചന നടത്തി.  പുതുതായി സ്ഥാപിച്ച  വെങ്കല പ്രതിമ ജില്ലാ സെക്രട്ടറി എം എം വർഗീസ്‌ അനാച്ഛാദനം ചെയ്തു.