08 December Wednesday

കെഎസ്‌ഇബിക്ക്‌ നഷ്ടം 78.28 ലക്ഷം

വെബ് ഡെസ്‌ക്‌Updated: Tuesday Oct 19, 2021
പാലക്കാട്‌
കഴിഞ്ഞ ദിവസം തിമിർത്തുപെയ്ത മഴയിൽ കെഎസ്‌ഇബിക്ക്‌ നഷ്ടം 78.28 ലക്ഷം രൂപ. ശനിമുതൽ ചൊവ്വവരെയുള്ള കണക്കാണിത്‌. കനത്തമഴയിലും കാറ്റിലും വൈദ്യുതിത്തൂൺ ഒടിഞ്ഞും കമ്പിപൊട്ടിയുമാണ്‌ നഷ്ടത്തിലധികവും. ഈ ദിവസങ്ങളിൽ വിവിധ കാരണങ്ങളാൽ 4,756 ഉപഭോക്താക്കൾക്ക്‌ വൈദ്യുതി മുടങ്ങി. 
ജില്ലയിൽ 11 കെവി ലൈൻ പോകുന്ന 13 തൂണുകൾ ഒടിഞ്ഞു. 13 ഇടത്ത്‌ എച്ച്‌ടി ലൈനുകൾ പൊട്ടി. ചെറിയ വൈദ്യുതിത്തൂൺ 72 എണ്ണമാണ്‌ മരംവീണും മറ്റും ഒടിഞ്ഞത്‌. 273 ഇടത്ത്‌ എച്ച്‌ടി ലൈനുകളും പൊട്ടി. ജില്ലയിൽ ചിലയിടങ്ങളിൽ ശക്തമായ കാറ്റ്‌ വീശിയതാണ്‌ നഷ്ടത്തിന്റെ അളവ്‌ ഉയർത്തിയത്‌.  മരക്കൊമ്പൊടിഞ്ഞും മരം കടപുഴകിയും വൈദ്യുതിത്തൂണുകളിലും ലൈനുകളിലും പതിക്കുകയായിരുന്നു. മൂന്നിടത്ത്‌ ട്രാൻസ്‌ഫോർമറുകളും തകർന്നു. വെള്ളപ്പൊക്ക, മണ്ണിടിച്ചിൽ ഭീഷണി നേരിട്ട 21 ഇടങ്ങളിലെ ട്രാൻസ്‌ഫോർമർ താൽക്കാലികമായി ഓഫാക്കി. മുൻകരുതലിന്റെ ഭാഗമായായിരുന്നു നടപടി. നിലവിൽ തകരാറിലായ എല്ലാ വൈദ്യുതി കണക്‌ഷനും പുനഃസ്ഥാപിച്ചു. അവധി ദിവസങ്ങളിലടക്കം ഉദ്യേഗസ്ഥർ ജോലിക്കെത്തിയാണ്‌ പലയിടത്തും വൈദ്യുതിബന്ധം പുനഃസ്ഥാപിച്ചത്‌. 
വരുംദിവസങ്ങളിൽ മഴ തുടരുമെന്ന മുന്നറിയിപ്പുള്ളതിനാൽ ഏത്‌ അടിയന്തര സാഹചര്യം നേരിടാനും കെഎസ്‌ഇബി ഒരുങ്ങി. വൈദ്യുതിക്കമ്പികൾ പൊട്ടിവീണത്‌ ശ്രദ്ധയിൽപ്പെട്ടാൽ 1912 എന്ന ടോൾഫ്രീ നമ്പറിൽ അറിയിക്കാം. 9496010101 എന്ന വാട്സാപ് നമ്പറിലും വിവരങ്ങൾ കൈമാറാം.

ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..



----
പ്രധാന വാർത്തകൾ
-----
-----
 Top