ഒരിടം, ഒരായിരം കാഴ്‌ചകൾ

134 യൂണിറ്റുകൾ  മേളയുടെ ഭാഗമായി 

-വ്യവസായ വകുപ്പിന് കീഴിലെ വിപണന സ്റ്റാളുകളില്‍നിന്ന് ലഭിച്ചത് 44.50 ലക്ഷം

മലപ്പുറം

സംരംഭകർക്ക് കൈത്താങ്ങായി മാറിയ പൊന്നാനിയിലെ ‘എന്റെ കേരളം' മെഗാ പ്രദർശന വിപണനമേളയിൽ വ്യവസായവകുപ്പിന് കീഴിലെ വിപണന സ്റ്റാളുകളിൽനിന്ന് ലഭിച്ചത് 44.50 ലക്ഷം രൂപ. വ്യവസായ വകുപ്പിൽ രജിസ്റ്റർചെയ്ത 134 യൂണിറ്റുകളാണ് മേളയുടെ ഭാഗമായത്. സംരംഭകർക്ക് അവരുടെ ഉൽപ്പന്നങ്ങൾ പ്രയോജനപ്രദമായ രീതിയിൽ പ്രദർശിപ്പിക്കാനും വിറ്റഴിക്കാനും അവസരം ലഭിച്ചു. കൈത്തറി ഉൽപ്പന്നങ്ങൾമുതൽ സോളാർ പാനൽ സജ്ജമാക്കിയ സ്റ്റാളുകൾ ഏറെ ജനശ്രദ്ധയാകർഷിച്ചു.  

സ്ത്രീ സംരംഭകരുടെ ഇരുപതിലധികം സ്റ്റാളുകളാണ് വ്യവസായ വകുപ്പ് ഒരുക്കിയത്. ഭക്ഷ്യവിഭവങ്ങൾ, കരകൗശല വസ്‌തുക്കൾ, അച്ചാറുകൾ, ചവിട്ടികൾ, ഓർഗാനിക്‌ ബാഗുകൾ, വസ്‌ത്രങ്ങൾ, കുടകൾ, ഫാൻസി സാമഗ്രികൾ, ഐസ്‌ക്രീം, ചോക്ലേറ്റ്‌, കേശസംരക്ഷണത്തിനുള്ള എണ്ണ എന്നിവയാണ് സ്ത്രീ സംരംഭകർ എത്തിച്ചത്.  ഭിന്നശേഷിക്കാരുടെ സ്റ്റാളുകളും ആളുകൾ ഏറ്റെടുത്തു. നാലിലധികം സ്റ്റാൾ ഉണ്ടായിരുന്നു. വെളിച്ചെണ്ണ, ഭക്ഷ്യോൽപ്പന്നങ്ങൾ, തടി ഉപയോഗിച്ചുള്ള അലങ്കാര വസ്തുക്കൾ, ചിരട്ട ഉൽപ്പന്നങ്ങൾ, കരകൗശല വസ്തുക്കൾ, ആയുർവേദ ഉൽപ്പന്നങ്ങൾ, മുളകൊണ്ടുള്ളവ, അലങ്കാര വസ്തുക്കൾ, തുണിത്തരങ്ങൾ, മസാലപ്പൊടികൾ, സോപ്പുകൾ എന്നിവയ്ക്കും ആവശ്യക്കാർ ഏറെ. പരിസ്ഥിതി സൗഹാർദ സോളാർ പാനൽ യൂണിറ്റ് സംരംഭകന് നിരവധി ഓർഡറുകളാണ് ലഭിച്ചത്. പല സംരംഭകരുടേയും ഉൽപ്പന്നങ്ങൾ വിറ്റഴിഞ്ഞശേഷം കൂടുതൽ എത്തിച്ചു.