ഉറപ്പാണ്‌ 
തൊഴിൽ

 

മലപ്പുറം

തീരമേഖലയിലെ അഭ്യസ്തവിദ്യരായ തൊഴിലന്വേഷകർക്ക് വിജ്ഞാന തൊഴിൽ മേഖലയിൽ അവസരമൊരുക്കുന്ന കേരള നോളജ് ഇക്കോണമി മിഷന്റെ തൊഴിൽതീരം പദ്ധതിക്ക് ജില്ലയിലെ ആറ് നിയോജക മണ്ഡലങ്ങളിൽ തുടക്കമായി. തിരൂരങ്ങാടി, വള്ളിക്കുന്ന്, താനൂർ, തിരൂർ, തവനൂർ, പൊന്നാനി മണ്ഡലങ്ങളിലെ മത്സ്യത്തൊഴിലാളി വിഭാഗത്തിൽപ്പെട്ടവർക്കായുള്ള വൈജ്ഞാനിക തൊഴിൽ പദ്ധതി ഫിഷറീസ് വകുപ്പിന്റെ സഹകരണത്തോടെയാണ്  നടപ്പാക്കുന്നത്. മത്സ്യത്തൊഴിലാളി കുടുംബങ്ങളുടെ വരുമാന വർധനവും സാംസ്കാരിക വിദ്യാഭ്യാസ ഉയർച്ചയുമാണ്  പദ്ധതി ലക്ഷ്യം. 

ജില്ലയിൽ ആറ് നിയോജക മണ്ഡലങ്ങളിൽനിന്നായി 987 പേർ പദ്ധതിക്കുകീഴിൽ രജിസ്റ്റർചെയ്തിട്ടുണ്ട്. 697 പേർ സ്ത്രീകളാണ്. പൊന്നാനി മണ്ഡലത്തിൽനിന്നാണ്‌ കൂടുതൽ പേർ–- 270. കുറവ്‌ തിരൂർ മണ്ഡലത്തിൽ–- 98 പേർ. പദ്ധതിയുടെ നിർവഹണത്തിനായി നിയോജക മണ്ഡലങ്ങളിൽ എംഎൽഎമാർ അധ്യക്ഷരായുള്ള സംഘാടക സമിതികൾ രൂപീകരിച്ചു. പദ്ധതി ഭാഗമായി വള​ന്റിയർമാർക്കുള്ള ഫീൽഡ്തല പരിശീലനങ്ങൾ പൂർത്തിയായി. 

തെരഞ്ഞെടുക്കാം 
ഇഷ്ടമേഖല 

നോളജ് മിഷന്റെ ഡിജിറ്റൽ പ്ലാറ്റ്ഫോം ഡിഡബ്ല്യുഎംഎസിൽ രജിസ്റ്റർചെയ്ത 18നും 40നും ഇടയിൽ പ്രായമുള്ള പ്ലസ്ടുവോ അതിനുമുകളിലോ വിദ്യാഭ്യാസ യോഗ്യതയുള്ള മത്സ്യത്തൊഴിലാളി സമൂഹത്തിലെ ഉദ്യോഗാർഥികളാണ്  പദ്ധതി ഗുണഭോക്താക്കൾ. ഉദ്യോഗാർഥികളുടെ അഭിരുചിയും ആഭിമുഖ്യവും മനസ്സിലാക്കി ആവശ്യാനുസരണം സൈക്കോമെട്രിക് ടെസ്റ്റ്, കരിയർ കൗൺസിലിങ്, പേഴ്സണാലിറ്റി ഡെവലപ്മെന്റ് ട്രെയിനിങ്, വർക്ക് റെഡിനസ് പ്രോഗ്രാം, റോബോട്ടിക് ഇന്റർവ്യൂ, ഇംഗ്ലീഷ് ഭാഷാ പ്രാവീണ്യം അളക്കുന്നതിനുള്ള ഇംഗ്ലീഷ് സ്കോർ ടെസ്റ്റ് തുടങ്ങിയ സേവനങ്ങൾ ഉപയോഗപ്പെടുത്താം. 

റിമോർട്ട് വർക്കുകൾ, ഫ്രീലാൻസ് ജോലികൾ, വർക്ക് ഓൺ ഡിമാൻഡ് ജോലികൾ, പാർട് ടൈം ജോലികൾ, സമുദ്ര മത്സ്യബന്ധനവുമായി ബന്ധപ്പെട്ട വൈജ്ഞാനിക തൊഴിലുകൾ  ഉൾപ്പെടെ നവലോക തൊഴിലുകൾ നേടുന്നതിനാവശ്യമായ പരിശീലനം നൽകും. തുടർന്ന് പദ്ധതി ഭാഗമായി നടത്തുന്ന പ്രത്യേക ജില്ലാതല തൊഴിൽമേളയിൽ പങ്കെടുക്കാം. ജില്ലയിൽ 2024 ജനുവരി 21നാണ് തൊഴിൽമേള.