നബാർഡ് വായ്‌പ നഷ്ടമാക്കിയത്‌ യുഡിഎഫ്‌ പിടിവാശി

സ്വന്തം ലേഖകൻ 

മലപ്പുറം

സുഭിക്ഷ കേരളം പദ്ധതിയിലെ 1500 കോടി വായ്‌പ നഷ്ടമായതുകൂടാതെ നബാർഡിന്റെ കാർഷികവിള വായ്‌പയ്‌ക്ക്‌ ഒരു ശതമാനം അധിക പലിശ നൽകേണ്ട ഗതികേടും മലപ്പുറത്തെ കർഷകർക്കുണ്ടായത്‌ കേരള ബാങ്കിൽ ലയിക്കേണ്ടെന്ന യുഡിഎഫ്‌ പിടിവാശിമൂലം. വായ്‌പാ വിതരണത്തിന്‌ കേരള ബാങ്കിൽ അംഗങ്ങളായ പ്രാഥമിക സംഘങ്ങളെയാണ്‌ നബാർഡ്‌ തെരഞ്ഞെടുത്തത്‌.  

കൊറോണ  മഹാമാരിമൂലം പ്രതിസന്ധി നേരിടുന്ന ഗ്രാമീണ മേഖലയിൽ പ്രത്യേക സാമ്പത്തിക പാക്കേജായി സ്‌പെഷൽ ലിക്വിഡിറ്റി സൗകര്യത്തിൽ 1500 കോടി രൂപയാണ്‌ കേരളത്തിനായി നബാർഡ്‌ നീക്കിവച്ചത്‌.  300 കോടിരൂപ കാർഷിക പുനർ വായ്പയായാണ് ആദ്യഘട്ടത്തിൽ കേരള സംസ്ഥാന സഹകരണ ബാങ്ക് (കേരള ബാങ്ക്) അനുവദിക്കുന്നത്. സംസ്ഥാന സഹകരണ ബാങ്ക് ചീഫ് എക്‌സിക്യൂട്ടീവ് ഓഫീസർമാർക്ക് ഏപ്രിൽ 23ന് അയച്ച കത്തുപ്രകാരം 4.95 ശതമാനം നിരക്കിലാണ് ഈ പുനർ വായ്പ സംസ്ഥാന സഹകരണ ബാങ്കിന് അനുവദിക്കുന്നത്. നബാർഡ്  സംസ്ഥാന സഹകരണ ബാങ്കുമായി ഉണ്ടാക്കിയ ധാരണാപത്രത്തിന്റെ അടിസ്ഥാനത്തിൽ കർഷകർക്ക് പുതുതായി വായ്പ അനുവദിക്കുന്നതിനാണ്‌ ഇത് ഉപയുക്തമാക്കേണ്ടത്. ഇത്തരം റീഫൈനാൻസ് വായ്പകൾക്ക് സംസ്ഥാന സർക്കാരാണ് ഗ്യാരണ്ടി. ത്രിതല സംവിധാനത്തിൽ പ്രവർത്തിക്കുന്ന കേരളത്തിലെ സഹകരണ വായ്പ മേഖല ദ്വിതല സംവിധാനമായി മാറുകയും റിസർവ് ബാങ്കിന്റെ അനുമതിയോടെ മലപ്പുറം ഒഴികെ 13 ജില്ലാ സഹകരണ ബാങ്കുകൾ കേരള സംസ്ഥാന സഹകരണ ബാങ്കിൽ ലയിച്ച് കേരള ബാങ്ക് രൂപീകരിക്കുകയും ചെയ്തിരുന്നു. ഇടത്തട്ട് സംവിധാനമായ ജില്ലാ സഹകരണ ബാങ്കുകളെ ലയിപ്പിക്കുകവഴി കുറഞ്ഞ പലിശ നിരക്കിൽ കാർഷിക വായ്പ ലഭ്യമാവാനുള്ള സാഹചര്യം മലപ്പുറം ഒഴികെ  ജില്ലകളിലുണ്ടായി. എന്നാൽ സങ്കുചിത രാഷ്ട്രീയ താൽപ്പര്യം മുൻനിർത്തി മലപ്പുറം ജില്ലാ സഹകരണ ബാങ്ക് കേരള ബാങ്കിൽ ചേരേണ്ടതില്ലെന്ന് തീരുമാനിച്ചു. സ്ഥാനമോഹം ഒന്നുകൊണ്ടുമാത്രം മലപ്പുറം ജില്ലാ സഹകരണ ബാങ്കിൽ ഭൂരിപക്ഷമുള്ള യുഡിഎഫ് കാലഘട്ടത്തിന്റെ ആവശ്യത്തിൽനിന്നും പിൻമാറി. ഒടുവിൽ കേരള ബാങ്കിൽ മലപ്പുറം ജില്ലാ സഹകരണ ബാങ്കിനെ ലയിപ്പിക്കാനുള്ള ഓർഡിനൻസിനെതിരെ കോടതിയിൽ പോയി. ഇതും സ്ഥിതി വഷളാക്കി.