കൊയിലാണ്ടി
ഭാര്യയേയും മക്കളേയും മർദിച്ചയാൾ സംഭവം അന്വേഷിക്കാൻ വീട്ടിലെത്തിയ പൊലീസുകാരേയും ആക്രമിച്ച്‌ പരിക്കേൽപ്പിച്ചു. എഎസ്ഐ അടക്കം മൂന്ന്‌ പൊലീസുകാർക്ക് പരിക്കേറ്റു. പൊലീസ് ജീപ്പും തകർത്തു. വെള്ളി രാത്രി ഒമ്പതോടെയാണ് സംഭവം. ചെങ്ങോട്ട്കാവ് മാടാക്കര മൂന്നുകുടിക്കൽ റൗഫ് (38) ആണ് കൊയിലാണ്ടി പൊലീസിനെ ആക്രമിച്ചത്. എഎസ്ഐ വിനോദ്, സിപിഒ ഗംഗേഷ്, ഹോം ഗാർഡ് സുരേഷ് എന്നിവർക്കാണ് പരിക്കേറ്റത്. ഇവരെ താലൂക്ക് ആശുപത്രിയിൽ പ്രവേശിപ്പിച്ചു.
റൗഫ് വീട്ടിൽവച്ച് ഭാര്യ റുബീനയെയും മൂന്ന്‌ മക്കളെയും ആക്രമിക്കുകയും പുറത്താക്കി വാതിലടയ്‌ക്കുകയും ചെയ്തതിനെ തുടർന്ന് കൊയിലാണ്ടി പൊലീസിൽ അഭയം തേടുകയായിരുന്നു. ഇത് അന്വേഷിക്കാനാണ് പൊലീസെത്തിയത്. എഎസ്ഐ വിനോദിന് തലയ്‌ക്കാണ് പരിക്കേറ്റത്. പ്രതി മാരകായുധവുമായി ആക്രമിക്കുകയായിരുന്നു. ഗംഗേഷിന്റെയും സുരേഷിന്റെയും സമയോചിത ഇടപെടൽ കാരണം വിനോദ് രക്ഷപ്പെടുകയായിരുന്നു. തുടർന്ന് പ്രതി സ്വയം തല ഭിത്തിയിലിടിച്ച് പൊട്ടിച്ച് പരിക്കേൽപ്പിച്ചു. തുടർന്ന് കൂടുതൽ പൊലീസെത്തിയാണ് ഇയാളെ കസ്റ്റഡിയിലെടുത്തത്. കോടതിയിൽ ഹാജരാക്കിയ പ്രതിയെ റിമാൻഡ്‌ ചെയ്തു. മജിസ്ട്രേട്ടിന്റെ നിർദേശപ്രകാരം പൊലീസ് കാവലിൽ താലൂക്ക് ആശുപത്രിയിൽ പ്രവേശിപ്പിച്ചു. കൊയിലാണ്ടി സിഐ എം വി ബിജു, എസ്ഐ വി അനീഷ്, എംപി ശൈലേഷ് എന്നിവരാണ് കേസന്വേഷിക്കുന്നത്.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
