ഫർണിച്ചർ ഗോഡൗണിൽ തീപിടിത്തം

കൊല്ലം

പള്ളിമുക്കിൽ ഫർണിച്ചർ ഗോഡൗൺ കത്തിനശിച്ചു. ഒന്നരക്കോടിയുടെ നാശനഷ്ടമുണ്ടായി. ഗോഡൗണിനു സമീപത്തെ വീടിനും ലക്ഷങ്ങളുടെ നാശനഷ്ടമുണ്ടായി. അപകടസമയം ഗോഡൗണിനുള്ളിൽ ആരുമില്ലാതിരുന്നതിനാൽ ആളപായം ഒഴിവായി. പള്ളിമുക്ക് ഹോണ്ട ഷോറൂമിന് പിറകിൽ മുഹമ്മദ്‌ ഷെരീഫിന്റെ ഉടമസ്ഥതയിലുള്ള ബാസ്‌ ഫർണിച്ചർ ഗോഡൗണാണ് കത്തിനശിച്ചത്. രണ്ടുനിലയിലായി ഇരുമ്പിൽ നിർമിച്ച ഷീറ്റുമേഞ്ഞ ഗോഡൗൺ കെട്ടിടം പൂർണമായും കത്തിനശിച്ചു.  ഗോഡൗണിനോട് ചേർന്ന കെട്ടിടങ്ങൾക്കും ഒരു വീടിനും തീപിടിച്ചു. സമീപത്തെ സംസം നഗർ 152 തണ്ടാശേരിൽ വീട്ടിൽ മുഹമ്മദ്‌ ഷാഫിയുടെ വീടിന്റെ മുകൾനില പൂർണമായി കത്തിനശിച്ചു. 

തിങ്കൾ രാവിലെ ഏഴിനാണ്‌ അപകടം. ഗോഡൗണിൽനിന്ന്‌ തീയും പുകയും ഉയരുന്നതുകണ്ട നാട്ടുകാർ വിവരം അഗ്നിരക്ഷാസേനയെ അറിയിച്ചു. ഇവിടെ സൂക്ഷിച്ച കുഷൻ ഫർണിച്ചറുകളിലേക്കും തടി ഉരുപ്പടികളിലേക്കും തീ ആളിപ്പടർന്നത്‌  പ്രദേശത്തെ ഒന്നടങ്കം ഭീതിയിലാഴ്‌ത്തി. ഇരുമ്പ് അലമാരകൾ ഉൾപ്പടെയുള്ള ഫർണിച്ചറുകൾ ചാരമായി. സമീപത്തെ ഷാഫിയുടെ രണ്ടുനില വീട്ടിലേക്ക് തീപടർന്ന്‌ മതിലുകൾ വിണ്ടുകീറുകയും ജനൽച്ചില്ലുകൾ പൊട്ടിത്തെറിക്കുകയും ചെയ്‌തു. വാട്ടർ ടാങ്കും വീട്ടിലെ വയറിങ്ങും പൊട്ടിത്തെറിച്ചു. വീട്ടുകാർ ഇറങ്ങി ഓടിയതിനാൽ ആളപായമില്ല. ഗോഡൗണിന് മുന്നിലെ വാഹന ഷോറൂമുകളിലേക്ക് തീപടരാതിരുന്നതിനാൽ വൻ ദുരന്തം ഒഴിവായി. അടുത്തുള്ള വൈദ്യുതി പോസ്റ്റിലേക്ക് തീപടർന്ന്‌ കേബിളുകളും കത്തിനശിച്ചിരുന്നു. തീപിടിത്തത്തിന്റെ കാരണം വ്യക്തമല്ല.

കടപ്പാക്കട, ചാമക്കട, പരവൂർ, കുണ്ടറ ഫയർസ്റ്റേഷനുകളിൽനിന്ന്‌ എത്തിയ 10 യൂണിറ്റ്‌ മൂന്നുമണിക്കൂറോളം നടത്തിയ പരിശ്രമത്തിനൊടുവിലാണ് തീ നിയന്ത്രണ വിധേയമാക്കിയത്. കടപ്പാക്കട സ്റ്റേഷൻ ഓഫീസർ വി ബൈജു, അസിസ്റ്റന്റ്‌ ഓഫീസർ ജി അനിൽകുമാർ, ചാമക്കട സ്റ്റേഷൻ ഓഫീസർ സുരേഷ്‌ കുമാർ എന്നിവരുടെ നേതൃത്വത്തിലായിരുന്നു രക്ഷാപ്രവർത്തനം.  ഇരവിപുരം ഇൻസ്പെക്ടറുടെ നേതൃത്വത്തിലുള്ള പൊലീസ്‌ സംഘവും നാട്ടുകാരും തീയണക്കാൻ നേതൃത്വം നൽകി.