കൊല്ലം
കേരള ഷോപ്സ് ആൻഡ് കൊമേഴ്സ്യൽ എസ്റ്റാബ്ലിഷ്മെന്റ് എംപ്ലോയീസ് ഫെഡറേഷൻ (സിഐടിയു) രാജ്ഭവൻ മാർച്ചിന്റെ പ്രചാരണാർഥമുള്ള സംസ്ഥാന വാഹനജാഥ 25ന് ജില്ലയിൽ പര്യടനം നടത്തുമെന്ന് യൂണിയൻ ജില്ലാ പ്രസിഡന്റ് എഴുകോൺ സന്തോഷും സെക്രട്ടറി ജി ആനന്ദനും വാർത്താസമ്മേളനത്തിൽ പറഞ്ഞു. ചെറുകിട വ്യാപാര മേഖലയെ തകർക്കുന്ന കേന്ദ്രസർക്കാർ നയങ്ങൾക്കെതിരെയുളള പ്രക്ഷോഭത്തിന്റെ ഭാഗമായാണ് ജാഥ. ഫെഡറേഷൻ സംസ്ഥാന ജനറൽ സെക്രട്ടറി പി സജി ക്യാപ്റ്റനും അഡ്വ. എസ് കൃഷ്ണമൂർത്തി മാനേജരുമായുള്ള ജാഥയ്ക്ക് രാവിലെ ഒമ്പതിന് കരുനാഗപ്പള്ളിയിലാണ് ആദ്യ സ്വീകരണം. തുടർന്ന് പകൽ 11ന് കൊട്ടാരക്കര, 12ന് പുനലൂർ, രണ്ടിന് കടയ്ക്കൽ, വൈകിട്ട് 4.30ന് പരവൂർ എന്നിവിടങ്ങളിൽ സ്വീകരണം നൽകും. വൈകിട്ട് ആറിന് ചിന്നക്കടയിൽ സമാപന സമ്മേളനം ചേരും. ഫെഡറേഷൻ സംസ്ഥാന പ്രസിഡന്റ് ടി വി രാജേഷ്, കെ പി അനിൽകുമാർ, എം ഹംസ, പി ബി ഹർഷകുമാർ, എ ജെ സുക്കാർണോ, കെ രവീന്ദ്രൻ, കവിത സാജൻ, അഡ്വ. മേഴ്സി ജോർജ് എന്നിവർ ജാഥാ അംഗങ്ങളാണ്.
ചെറുകിട വ്യാപാര മേഖലയെ തകർക്കുന്ന കേന്ദ്രസർക്കാരിന്റെ ബഹുരാഷ്ട്ര കുത്തകവൽക്കരണം അവസാനിപ്പിക്കുക, തൊഴിലാളിദ്രോഹ ലേബർ കോഡുകൾ പിൻവലിക്കുക, കേന്ദ്ര സർക്കാരിന്റെ വർഗീയവൽക്കരണം അവസാനിപ്പിക്കുക, ഷോപ്പ് മേഖലയിൽ ഇഎസ്ഐ, പിഎഫ് എന്നിവ കർശനമായി നടപ്പാക്കുക എന്നീ മുദ്രാവാക്യങ്ങൾ ഉയർത്തിയാണ് ജാഥ. 30നാണ് രാജ്ഭവൻ മാർച്ച്. വാർത്താസമ്മേളനത്തിൽ സംസ്ഥാന–- ജില്ലാ ഭാരവാഹികളായ എസ് ജിജി, എസ് ശ്രീലാൽ, അഡ്വ. ഡി ഷൈൻദേവ് എന്നിവരും പങ്കെടുത്തു.
ദേശാഭിമാനി വാർത്തകൾ ഇപ്പോള് വാട്സാപ്പിലും ലഭ്യമാണ്.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
