കൊല്ലം
ജില്ലയിൽ കോൺഗ്രസ് മണ്ഡലം പ്രസിഡന്റുമാരെ നിശ്ചയിക്കാൻ ചൊവ്വാഴ്ച ചേരാനിരുന്ന പുനഃസംഘടനാസമിതി യോഗം എ ഗ്രൂപ്പിന്റെയും ചെന്നിത്തല വിഭാഗത്തിന്റെയും നിസ്സഹകരണം കാരണം നടന്നില്ല. ഡിസിസി ഓഫീസിൽ ചേരാനിരുന്ന യോഗം ബഹിഷ്‌ക്കരിക്കുമെന്ന്‌ എ ഗ്രൂപ്പ് മുന്നറിയിപ്പ്‌ നൽകിയിരുന്നു. ബ്ലോക്ക് പ്രസിഡന്റുമാരെ കെ സി വേണുഗോപാൽ–-കെ സുധാകരൻ–- വി ഡി സതീശൻ അച്ചുതണ്ട്‌ ഏകപക്ഷീയമായി തീരുമാനിച്ച്‌ പ്രഖ്യാപിക്കുകയായിരുന്നു. ഇതിനെതിരെ ഉയർന്ന ആക്ഷേപങ്ങളും പരാതികളും പരിഹരിക്കാതെ ഇനിയൊരു കൂടിയാലോചനയ്ക്കും ഇല്ലെന്ന നിലപാടിലാണ്‌ എ ഗ്രൂപ്പ്. ബ്ലോക്ക് പ്രസിഡന്റുമാരുടെ പുനഃസംഘടനയിൽ ജില്ലയിൽ എ ഗ്രൂപ്പിന് കാര്യമായ പ്രാതിനിധ്യം ലഭിച്ചില്ല. ഈ പരാതിയാണ് ഐ ഗ്രൂപ്പിലെ ചെന്നിത്തല വിഭാഗത്തിനുമുള്ളത്. ചെന്നിത്തലയ്‌ക്കൊപ്പം നിന്നവരെ കെ സി വിഭാഗം അരിഞ്ഞുവീഴ്‌ത്തുകയായിരുന്നു.
നേരത്തെ പത്ത് ബ്ലോക്ക് പ്രസിഡന്റുമാർ ഉണ്ടായിരുന്ന എ ഗ്രൂപ്പിന് പുനഃസംഘടനയിൽ ഇത് ഏഴായിച്ചുരുങ്ങി. വടക്കേവിള, ഓച്ചിറ, എഴുകോൺ ബ്ലോക്കുകളാണ്‌ എ ഗ്രൂപ്പിന് നഷ്ടമായത്. വടക്കേവിളയിലും എഴുകോണിലും കെ സുധാകരന്റെ നോമിനികളാണ്‌ പ്രസിഡന്റുമാരായത്, ഓച്ചിറയിൽ കെ സി വേണുഗോപാലിന്റെ അനുയായിയും. ചെന്നിത്തല വിഭാഗത്തിനും പുനഃസംഘടനയിൽ കനത്ത പ്രഹരമേറ്റു. സ്വന്തമെന്ന്‌ പറയാൻ ബ്ലോക്ക് പ്രസിഡന്റുമാർ ഇല്ലാത്ത അവസ്ഥയാണ് ഗ്രൂപ്പിനുള്ളത്. ഉറപ്പായും ലഭിക്കുമെന്ന്‌ കരുതിയ കുന്നത്തൂർ ബ്ലോക്കും കെ സി വിഭാഗം തട്ടിയെടുത്തു. ഐഎൻടിയുസി സംസ്ഥാന പ്രസിഡന്റ് ആർ ചന്ദ്രശേഖരന്റെ ജന്മസ്ഥലവും പ്രവർത്തന കേന്ദ്രവുമാണ്‌ കുന്നത്തൂർ. ഇവിടെ ചെന്നിത്തലയും ചന്ദ്രശേഖരനും നിർദേശിച്ച വി വേണുഗോപാലക്കുറുപ്പിനെ സതീശൻ വെട്ടുകയായിരുന്നു. കാരയ്‌ക്കാട്ട്‌ അനിലാണ്‌ പ്രസിഡന്റായത്. പ്രധാന ഗ്രൂപ്പുകളുടെ തർക്കത്തിൽ ഒന്നുംചെയ്യാനാകാത്ത അവസ്ഥയിലാണ് കൊടിക്കുന്നിൽ സുരേഷിനൊപ്പമുള്ള ഡിസിസി പ്രസിഡന്റ് പി രാജേന്ദ്രപ്രസാദ്‌.
കരുനാഗപ്പള്ളിയിലും
ഐ ഗ്രൂപ്പിന്റെ രഹസ്യയോഗം
കരുനാഗപ്പള്ളി
യൂത്ത് കോൺഗ്രസ് തെരഞ്ഞെടുപ്പുമായി ബന്ധപ്പെട്ട് കരുനാഗപ്പള്ളിയിലും ഐ ഗ്രൂപ്പിന്റെ രഹസ്യയോഗം. കെ സി വേണുഗോപാൽ, വി ഡി സതീശൻ, കെ സുധാകരൻ എന്നിവർ ചേർന്ന് തീരുമാനിക്കുന്ന നേതാക്കളെ വിജയിപ്പിക്കാൻ ഐ ഗ്രൂപ്പ് നേതാവ് പ്രസന്നൻ ഉണ്ണിത്താന്റെ കല്ലേലിഭാഗത്തെ വീട്ടിൽ ചേർന്ന യോഗം തീരുമാനിച്ചു. കരുനാഗപ്പള്ളി എംഎൽഎസി ആർ മഹേഷ് നേതൃത്വം നൽകുന്ന ചെന്നിത്തല വിഭാഗത്തിനെ പരാജയപ്പെടുത്താനും യോഗത്തിൽ തീരുമാനമെടുത്തു.
കോൺഗ്രസ് കരുനാഗപ്പള്ളി ബ്ലോക്ക് മുൻ പ്രസിഡന്റ് എൻ അജയകുമാർ, കെപിസിസി സെക്രട്ടറിമാരായ ആർ രാജശേഖരൻ, ബിന്ദു ജയൻ കെപിസിസി എക്സിക്യൂട്ടീവ് അംഗം എം അൻസാർ, കോൺഗ്രസ്, യൂത്ത് കോൺഗ്രസ് നേതാക്കളായ ഷിബു എസ് തൊടിയൂർ, പാവുമ്പ അനിൽകുമാർ, രാജപ്രിയൻ, നിയാസ് ഇബ്രാഹിം, ക്ലാപ്പന ശ്രീകുമാർ, ഷീബാ ബാബു, ജീവൻ, കെഎസ്‍യു നേതാക്കളായ സുബിൻഷാ, ജെയ്സൺ എന്നിവർ യോഗത്തിൽ പങ്കെടുത്തതായാണ് വിവരം.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
