02 July Saturday

കെ ഫോൺ സൗജന്യ കണക്‌ഷൻ ; ഈ മാസം 14,000 കുടുംബത്തിന്‌

വെബ് ഡെസ്‌ക്‌Updated: Thursday May 12, 2022


തിരുവനന്തപുരം
കെ ഫോൺ സൗജന്യ ഇന്റർനെറ്റ്‌ കണക്‌ഷൻ 14,000 ബിപിഎൽ കുടുംബത്തിന്‌ ഉടനെത്തും. ഒരോ മണ്ഡലത്തിലും 500 കുടുംബത്തിനാണ് സേവനം ലഭിക്കുക. ഇതിൽ100 എണ്ണം  ഉടൻ നൽകും. ഇതിന്റെ ഉദ്‌ഘാടനം മാസാവസാനം നടക്കും. തദ്ദേശസ്ഥാപനമാണ് അർഹരെ കണ്ടെത്തുന്നത്. സെക്കൻഡിൽ 15 എംബി വേഗത്തിൽ ദിവസം ഒന്നര ജിബി സൗജന്യമായി നൽകും.

സേവനദാതാക്കളെ കണ്ടെത്താനും ടെൻഡറായി. 1531 കോടി ചെലവഴിക്കുന്ന പദ്ധതിയുടെ 61.38 ശതമാനം പ്രവൃത്തിയും പൂർത്തിയായി. 17,891 സർക്കാർ ഓഫീസിൽ കണക്‌ഷനെത്തി. 20 ലക്ഷം ദരിദ്ര കുടുംബത്തിന്‌ സൗജന്യമായും മറ്റുള്ളവർക്ക്‌ കുറഞ്ഞ നിരക്കിലും ഇന്റർനെറ്റ്‌ നൽകുന്നതാണ് പദ്ധതി. സ്‌കൂൾ, സർക്കാർ ഓഫീസ്, ആശുപത്രി, പൊലീസ്‌ സ്‌റ്റേഷൻ തുടങ്ങിയ 30,000 സർക്കാർ സ്ഥാപനത്തിലാണ് കണക്‌ഷൻ നൽകുന്നത്‌. 52,000 കിലോമീറ്ററിലാണ്‌ ഒപ്‌റ്റിക്കൽ ഫൈബർ ശൃംഖല സ്ഥാപിക്കുന്നത്‌. കേബിൾ ഓപ്പറേറ്റർമാർ, ടെലികോം ഓപ്പറേറ്റർ, ഇന്റർനെറ്റ്‌ സർവീസ്‌ പ്രൊവൈഡർ, കണ്ടന്റ്‌ സർവീസ്‌ പ്രൊവൈഡർ തുടങ്ങി എല്ലാ സർവീസ്‌ പ്രൊവൈഡർമാർക്കും ശൃംഖല ഉപയോഗിക്കാനാകും. ഉയർന്ന നിലവാരത്തിലുള്ള നിരീക്ഷണ ക്യാമറ സ്ഥാപിക്കാനും ട്രാഫിക്‌ മാനേജ്‌മെന്റ്‌ സിസ്റ്റം കാര്യക്ഷമമാക്കാനും പദ്ധതി ഉപകരിക്കും.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..




----
പ്രധാന വാർത്തകൾ
-----
-----
 Top