ആന, കുരങ്ങ്, പന്നി... കഷ്ടമാണവസ്ഥ

കാടകം

കുരങ്ങുകളുടെ ശല്യം പൊറുതിമുട്ടിയ കർഷകർ സ്ഥാപിച്ച കെണിയിൽ നിന്ന് 30 കുരങ്ങുകളെ തുറന്നുവിട്ടു. കാറഡുക്ക പഞ്ചായത്തിലെ കാടകം കൊട്ടംകുഴിയിലാണ് സംഭവം. 

കർഷകർ ഏറെയുള്ള കൊട്ടംകുഴി പ്രദേശത്ത് കുരങ്ങ് ശല്യം രൂക്ഷമായപ്പോൾ കുരങ്ങു കെണി സ്ഥാപിക്കാൻ പദ്ധതിയിട്ടു. പിടിച്ച കുരങ്ങുകളെ ഉൾവനത്തിൽ കൊണ്ട് വിടാൻ വനംവകുപ്പും തയ്യാറായതോടെ ദേലംപാടി പാണ്ടിയിൽ നിന്ന് കെണികളെത്തി. പതിനഞ്ചായിരം രൂപയാണ് നിലവാടക. ജനവാസകേന്ദ്രങ്ങളിൽ കെണി സ്ഥാപിച്ച ശേഷം ദൂരെ ഒരാൾ കാവലുമിരിക്കും. കെണിയുടെ കവാടത്തിന്റെ നിയന്ത്രണം കാവൽക്കാരന്റെ കൈയിലാണ്. പഴവും തേങ്ങയും വച്ച് കുരങ്ങിനെ കൂട്ടിനകത്താക്കും. പിന്നീട് വനംവകുപ്പ് ജീവനക്കാരെത്തി കൊണ്ട് പോകും. ഒരു ശബ്ദവുമുണ്ടാക്കാതെ കവലിരിക്കുന്നയാളിനും കൊടുക്കണം 2000 രൂപ. കൂട്ടിൽ പെട്ട കുരങ്ങന്മാർക്ക് ഭക്ഷണത്തിന് നൽകുന്ന പഴങ്ങളുടെ ചെലവും വേറെ. അങ്ങനെ 30 കുരങ്ങുകൾ പെട്ടിയിൽ വീണു. പകൽ ഡ്യൂട്ടി കഴിഞ്ഞ് വനം വകുപ്പുകാരെയും അറിയിച്ച് ശനിയാഴ്ച രാവിലെ കെണിയുടെ അരികത്ത് എത്തിയ നാട്ടുകാരും കാവൽക്കാരനും ഞെട്ടി. മുഴുവൻ കുരങ്ങുകളെയും തുറന്നുവിട്ടിരിക്കുന്നു. 

സുരേഷ് കുമാർ കൺവീനറും പഞ്ചായത്ത് അംഗം സത്യവതി ചെയർമാനായുള്ള കമ്മിറ്റിയാണ് കുരങ്ങുകളിൽ നിന്ന് രക്ഷ നേടാനുള്ള സംവിധാനവുമായി ഇറങ്ങിയത്. ഒരു വീടിൽ നിന്ന് 500 രൂപ സ്വരൂപിച്ചാണ് കുരങ്ങുകളെ ‘പിടിക്കാൻ' ഇറങ്ങിയത്. 

നാട്ടുകാരിൽ തന്നെ ചിലർ ഒപ്പിച്ച പണിയെന്നാണ് കമ്മിറ്റിക്കാരുടെ അഭിപ്രായം. എന്തായാലും വീണ്ടും കുരങ്ങുകളെ കെണിയിൽ വീഴ്ത്തിയാലെ കൃഷി തുടങ്ങാനാകൂ എന്ന അഭിപ്രായത്തിലാണ് കർഷകർ.