വീട്ടിൽ കഴിയുന്ന രോഗികളുടെ എണ്ണം കുറക്കും

കാസർകോട്‌

ജില്ലയിലെ കോവിഡ്- വ്യാപനം നിയന്ത്രിക്കാൻ വീടുകളിൽ നിരീക്ഷണത്തിലാക്കുന്നവരുടെ എണ്ണം പരിമിതപ്പെടുത്താനും  രോഗികളുടെ വിപുലമായ സമ്പർക്കപട്ടിക തയ്യാറാക്കാനും നിർദേശം.

കലക്ടർ ഭണ്ഡാരി സ്വാഗത് രൺവീർ ചന്ദിന്റെ അധ്യക്ഷതയിൽ ചേർന്ന   തദ്ദേശ സ്ഥാപന അധ്യക്ഷരുടെയും സെക്രട്ടറിമാരുടെയും മെഡിക്കൽ ഓഫീസർമാരുടെയും  ഓൺലൈൻ യോഗത്തിലാണ്‌ നിർദേശം.  നാഷണൽ ഹെൽത്ത് മിഷൻ ജില്ലാ പ്രൊജക്ട് മാനേജർ ഡോ. എ വി രാമദാസാണ്  നിർദേശങ്ങൾ അവതരിപ്പിച്ചത്.

മതിയായ സൗകര്യങ്ങളുണ്ടെങ്കിലേ വീട്ടിൽ നിരീക്ഷണത്തിലിരിക്കാവൂ. പ്രത്യേക ശുചിമുറിയില്ലെങ്കിൽ

നിർബന്ധമായും കോവിഡ്‌ പ്രഥമ കേന്ദ്രങ്ങളിലേക്ക് മാറണം.  എല്ലാ പഞ്ചായത്തിലും  സെന്ററുകൾ സജ്ജമാണ്. വീടുകളിൽ നിന്ന് രോഗവ്യാപനം രൂക്ഷമാകുന്ന സാഹചര്യത്തിലാണ് ഈ നിർദേശം. സാരമായ ആരോഗ്യ പ്രശ്‌നമുള്ളവരെ നിർബന്ധമായും സിഎഫ്എൽടിസികളിലേക്ക് മാറ്റണം. 

കോവിഡ് പോസിറ്റീവ് ആകുന്നതിന് രണ്ട് ദിവസം മുമ്പും തുടർന്നുള്ള മൂന്ന് ദിവസവും നേരിട്ട് സമ്പർക്കത്തിലേർപ്പെട്ടവരെ നിരീക്ഷണത്തിലാക്കും. ഇതിന്റെ വിവര ശേഖരണത്തിനൊപ്പം കൃത്യമായി വാർഡ്തല ജാഗ്രതാ സമിതികളുടെ നിരീക്ഷണവും ഏർപ്പെടുത്തും. കണ്ടെയിൻമെന്റ് സോൺ കേന്ദ്രീകരിച്ച് ജാഗ്രതാ സമിതികളുടെ പ്രവർത്തനം ശക്തമാക്കണം.  രോഗികൾക്ക് പൾസ് ഓക്സി മീറ്ററുകൾ ലഭ്യമാകുന്നുണ്ടെന്ന് ഉറപ്പ് വരുത്തണമെന്നും ആർടിപിസിആർ നടത്തിയാൽ ഫലം വരും വരെ സമ്പർക്കമില്ലാതെ നിരീക്ഷണത്തിൽ കഴിയണമെന്നും നിർദേശിച്ചു.

കർണാടകയിലേക്ക് പോകാൻ ആർടിപിസിആർ ടെസ്റ്റ് നിർബന്ധമാക്കിയ സാഹചര്യത്തിൽ ഫലം ലഭിക്കുന്നതിന്റെ കാലതാമസം ഒഴിവാക്കണമെന്ന് അതിർത്തി മേഖലയിലെ പഞ്ചായത്ത് പ്രസിഡന്റുമാർ ആവശ്യപ്പെട്ടു.  ഉചിതമായ നടപടി സ്വീകരിക്കുമെന്ന് കലക്ടർ അറിയിച്ചു.  പഞ്ചായത്ത് ഡെപ്യൂട്ടി ഡയറക്ടർ  ജയ്സൺ മാത്യുവും സംസാരിച്ചു.