വികസന പദ്ധതികൾക്ക്‌ തുടക്കം

തലശേരി

മലബാർ ക്യാൻസർ സെന്ററിനെ രാജ്യാന്തരതലത്തിൽ അറിയപ്പെടുന്ന സ്ഥാപനമാക്കി മാറ്റുകയാണ് സർക്കാർ ലക്ഷ്യമെന്ന് മുഖ്യമന്ത്രി പിണറായി വിജയൻ.  114 കോടിയുടെ മലബാർ ക്യാൻസർ സെന്റർ പിജി ഇൻസ‌്റ്റിറ്റ്യൂട്ട് വികസന പദ്ധതിയുടെയും പീഡിയാട്രിക് ഓങ്കോളജി ബ്ലോക്കടക്കം 50 കോടിയുടെ പൂർത്തീകരിച്ച പദ്ധതിയുടെയും  ഉദ്ഘാടനം ഓൺലൈനായി നിർവഹിക്കുകയായിരുന്നു അദ്ദേഹം. 

ക്യാൻസർ സെന്റർ പിജി ഇൻസ്റ്റിറ്റ്യൂട്ട് ആയി ഉയർത്തുന്നതിന്റെ ഭാഗമായി 300 ഓളം വിദ്യാർഥികൾക്ക‌് താമസിച്ച‌് പഠിക്കാൻ 32 കോടി രൂപ ചെലവിലാണ‌് സ‌്റ്റുഡന്റ‌് ഹോസ‌്റ്റൽ പണിയുന്നത‌്. എട്ട‌് നിലയുള്ള ഹോസ‌്റ്റൽ  നാലുഘട്ടമായി പൂർത്തീകരിക്കും. ഇതോടൊപ്പം 81.69 കോടി രൂപ ചെലവഴിച്ച‌് റേഡിയേഷൻ ഓങ്കോളജി ബ്ലോക്കും നിർമിക്കും. കുട്ടികളുടെ ചികിത്സയ്ക്കായുള്ള പീഡിയാട്രിക് ഓങ്കോളജി ബ്ലോക്ക‌് കളിസ്ഥലം, സിനിമ തിയേറ്റർ,  ഗ്രന്ഥശാല എന്നിവയോടെ ശിശു സൗഹൃദ രീതിയിലാണ് രൂപകൽപന ചെയ‌്തത‌്. ചികിത്സക്കെത്തുന്ന കുട്ടികൾക്ക‌് എല്ലാവിധത്തിലുമുള്ള മാനസികോല്ലാസം പ്രദാനം ചെയ്യാൻ ഇവിടെ സാധിക്കും. 

സർക്കാർ മേഖലയിൽ കുട്ടികളുടെ മജ്ജ മാറ്റിവയ്‌ക്കൽ ശസ്ത്രക്രിയ നടത്തുന്ന ഏക സ്ഥാപനമെന്ന പ്രത്യേകതയും മലബാർ ക്യാൻസർ സെന്ററിനുണ്ട്.  64 സ്ലൈസ‌് സിടി സ്കാൻ ഉൾപ്പെടെയുള്ള നൂതന സംവിധാനം വരുന്നതോടെ കൂടുതൽ വ്യക്തതയോടെയും കൃത്യമായും ചികിത്സ ഉറപ്പുവരുത്താനാവും.ഡയരക്ടർ ഡോ. സതീശന്റെ അർപ്പണബോധത്തോടെയുള്ള പ്രവർത്തനവും എംസിസിയെ ഉയരങ്ങളിലെത്തിക്കാൻ സഹായിച്ചിട്ടുണ്ടെന്നും മുഖ്യമന്ത്രി പറഞ്ഞു. 

നാടിന്റെ അഭിമാനസ‌്തംഭമായി  ക്യാൻസർ സെന്റർ വളരുകയാണെന്ന‌് അധ്യക്ഷയായ മന്ത്രി കെ കെ ശൈലജ പറഞ്ഞു. ഇപ്പോഴത്തെ മുഖ്യമന്ത്രി വൈദ്യുതി മന്ത്രിയായിരിക്കെയാണ‌് എംസിസിക്ക‌് രൂപം നൽകിയത‌്. ഇതിന്റെ പേരിൽ വ്യക്തിപരമായി തന്നെ അദ്ദേഹം ഒരുപാട‌് പ്രയാസം അനുഭവിച്ചു. എല്ലാകാലത്തും ജനങ്ങൾ നന്ദിയോടെ ഓർക്കുന്ന ലോകോത്തര നിലവാരത്തിലേക്ക‌് ക്യാൻസർ സെന്റർ ഉയരുകയാണെന്നും കെ കെ ശൈലജ പറഞ്ഞു.