തെരുവ് കച്ചവട മേഖലകളെ തരംതിരിച്ച് 
നിയന്ത്രണം ഏർപ്പെടുത്തും

തൊടുപുഴ

തെരുവ് കച്ചവടത്തിന് കരട് നിയമാവലിയുമായി തൊടുപുഴ ന​ഗരസഭ. വാഹന ​ഗതാ​ഗതത്തിനും ജനങ്ങൾക്കും തടസമുണ്ടാക്കുന്ന വിധത്തിലും റോഡുകളുടെ പ്രാധാന്യത്തിന്റെയും വീതിയുടെയും അടിസ്ഥാനത്തിലും തെരുവ് കച്ചവട മേഖലകളെ തരംതിരിച്ച് നിയന്ത്രണം ഏർപ്പെടുത്തും. തിങ്കളാഴ്‍ച ചേർന്ന കൗൺസിൽ യോ​ഗം നിയമാവലി അം​ഗീകരിച്ചു. മുൻസിപ്പൽ ബസ് സ്റ്റാൻഡുമുതൽ ​ഗാന്ധിസ്‍ക്വയർ വരെയും റിവർവ്യൂ റോഡ്, കാരിക്കോട് ക്ഷേത്ര പരിസരം, മൗര്യ ഹോട്ടലിന് മുൻവശം, വിമല പബ്ലിക് സ്‍കൂൾ പരിസരം എന്നിവിടങ്ങൾ തെരുവ് കച്ചവട നിരോധിത മേഖലയായി പ്രഖ്യാപിച്ചു. 

അനധികൃത കച്ചവടം തടയാനും തിരിച്ചറിയൽ കാർഡിന്റെ ​ദുരുപയോ​ഗം ഇല്ലാതാക്കാനും തെരുവ് കച്ചവടക്കാർക്ക് വെൻഡിങ് സർട്ടിഫിക്കറ്റ് നൽകാനും ഫീസ് ഈടാക്കാനും തീരുമാനമായി. ഇവരണ്ടുമില്ലാതെ ന​ഗരസഭ പരിധിയിൽ തെരുവ് കച്ചവടം ചെയ്യുന്നവരെ ഒഴിപ്പിക്കും. തെരുവ് കച്ചവട ലൈസൻസിന്റെ മറവിൽ ഒന്നിലധികം ഇടങ്ങളിൽ കച്ചവടം നടത്തുന്നതിനെതിരെ കർശന നടപടിയെടുക്കും. തെരുവ് കച്ചവടത്തിനായി ഉപയോ​ഗിക്കാവുന്ന സ്ഥലം 25 ചതുരശ്രയടിയായി നിജപ്പെടുത്തും. ഉപജീവന ഉപാധിയുടെ മറവിൽ ന​ഗരസഭ പരിധിയിൽ നടത്തുന്ന തെരുവ് കച്ചവടങ്ങൾക്കെതിരെ നടപടിയെടുക്കും. കരട് നിയമാവലി പൊതുജനാഭിപ്രായം തേടി ന​ഗരസഭ ഓഫീസിൽ പ്രസിദ്ധീകരിച്ചിട്ടുണ്ട്. ഒക്ടോബർ 25നകം ലഭിക്കുന്ന അഭിപ്രായങ്ങൾ കൂടി പരി​ഗണിച്ച് നിയമാവലി അന്തിമമാക്കും. ആക്ഷേപങ്ങൾ ന​ഗരസഭാ സെക്രട്ടറിയെ രേഖാമൂലം അറിയിക്കണം.