തൊടുപുഴ
ശുചീകരണ തൊഴിലാളികളുടെ തൊഴിൽ സാഹചര്യം വിലയിരുത്തുന്നതിന് സഫായ് കർമചാരി കമീഷൻ അംഗം ഡോ. പി പി വാവ തൊടുപുഴയിൽ സന്ദർശനം നടത്തി. നഗരസഭ കോൺഫറൻസ് ഹാളിൽ ചേർന്ന യോഗത്തിൽ ചെയർമാൻ സനീഷ് ജോർജ് അധ്യക്ഷനായി. ശുചീകരണ പ്രവർത്തനങ്ങളിൽ ഏർപ്പെടുന്ന തൊഴിലാളികളുടെ ജീവിത നിലവാരവും തൊഴിൽ സാഹചര്യവും വിലയിരുത്തി.
വിദ്യാഭ്യാസമേഖലയിൽ ശുചീകരണ തൊഴിലാളികളുടെ മകൾക്ക് അഞ്ച് ശതമാനം സംവരണം ഏർപ്പെടുത്തിയിട്ടുണ്ടെന്നും കേന്ദ്ര–-- സംസ്ഥാന സർക്കാരുകൾ നടപ്പാക്കുന്ന ക്ഷേമ പദ്ധതികളുടെ പ്രയോജനം ശുചീകരണ തൊഴിലാളികൾക്ക് ലഭിക്കുന്നുണ്ടോ എന്നത് നഗരസഭ ഉറപ്പുവരുത്തണമെന്നും കമീഷൻ പറഞ്ഞു.
തൊടുപുഴ നഗരസഭയിൽ മാനുവൽ സ്കാവെഞ്ചിങ്ങിൽ ഏർപ്പെടുന്ന തൊഴിലാളികളെ കണ്ടെത്തിയിട്ടില്ല. നഗരസഭ ശുചീകരണ വിഭാഗം തൊഴിലാളികളും ഈ പ്രവർത്തിയിൽ ഏർപ്പെടുന്നില്ല. നഗരപരിധിയിൽ സെപ്റ്റിക് ടാങ്കുകൾ, കക്കൂസ്, മാലിന്യ കുഴികൾ എന്നിവ നിറയുന്ന സാഹചര്യത്തിൽ മോട്ടോർ ഉപയോഗിച്ച് പമ്പ്ചെയ്ത വാഹനത്തിൽ കയറ്റി കൊച്ചി ബ്രഹ്മപുരം പ്ലാന്റിൽ എത്തിക്കുന്ന ഒരു ഏജൻസിയും അതിനായി മൂന്ന് തൊഴിലാളികളെയും അന്വേഷണത്തിൽ കണ്ടെത്തിയിട്ടുണ്ട്. ഇവർക്ക് ആവശ്യമായ സുരക്ഷാ ഉപകരണങ്ങൾ എജൻസി തന്നെ ലഭ്യമാക്കുന്നുണ്ട്.
തൊടുപുഴ നഗരസഭയുടെ കീഴിൽ 17 പുരുഷൻമാരും 21 സ്ത്രീകളുമടക്കം 38 ശുചീകരണ തൊഴിലാളികലാണുള്ളത്. നഗരത്തിൽ ഓടകളുടെ വൃത്തിയാക്കൽ, പൊതു ശുചീകരണ പ്രവർത്തനങ്ങൾ എന്നീ തൊഴിലുകളിൽ ഏർപ്പെടുന്ന ഇവർക്ക് ആവശ്യമായ സുരക്ഷാ ഉപകരണങ്ങൾ നൽകുകയും ആവശ്യമായ മെഡിക്കൽ ചെക്കപ്പുകൾ നടത്തി വരുന്നുണ്ടെന്നും അന്വേഷണ റിപ്പോർട്ടിലുണ്ട്.
അഡീഷണൽ ജില്ലാ മജിസ്ട്രേറ്റ് ഷൈജു പി ജേക്കബ്, നഗരസഭ ആരോഗ്യസ്ഥിരം സമിതി അധ്യക്ഷൻ എം എ കരീം, മുൻസിപ്പൽ സെക്രട്ടറി ബിജുമോൻ ജേക്കബ്,ശുചിത്വ മിഷൻ അസിസ്റ്റന്റ് ഡെവലപ്മെന്റ് കമീഷ്ണർ ജെ ആർ ലാൽ കുമാർ, എൽഎസ്ജിഡി ഡി പി ജോസഫ്, സംസ്ഥാന നോഡൽ ഓഫീസർ അഡ്വ. ഗോപികൊച്ചുരാമൻ, നഗരസഭ ക്ലീൻസിറ്റി മാനേജർ ഇ എം മീരാൻകുഞ്ഞ് എന്നിവർ യോഗത്തിൽ പങ്കെടുത്തു.
ദേശാഭിമാനി വാർത്തകൾ ഇപ്പോള് വാട്സാപ്പിലും ലഭ്യമാണ്.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
