കുമരകത്തുനിന്ന് 
5 ചുണ്ടന്മാർ

പുന്നമടക്കായലിൽ നെഹ്രു ട്രോഫി ജലോത്സവത്തിന്റെ ആരവം മുഴങ്ങുമ്പോൾ കുമരകത്തിന്റെ കരുത്ത്‌ തുഴകളിലാവാഹിച്ച്‌ അഞ്ച്‌ ചുണ്ടൻ വള്ളങ്ങളുമുണ്ടാകും. സെപ്‌തംബർ നാലിന്‌ നടക്കുന്ന ജലോത്സവത്തിനായി വള്ളങ്ങളുടെ പരിശീലനത്തിന്‌ തുടക്കം കുറിച്ചു. ജലോത്സവത്തിന്റെ വരവറിയിച്ച്‌ തുഴക്കരുത്തിന്റെ നാട്‌ ഇപ്പോഴേ ആവേശത്തിൽ മുങ്ങി. ഏഴ്‌ വെള്ളിക്കപ്പ് സ്വന്തമാക്കിയിട്ടുള്ള കുമരകം ബോട്ട് ക്ലബ്‌ ഇത്തവണ ആയാപറമ്പ് പാണ്ടി ചുണ്ടനിൽ മത്സരിക്കും. ആറ്‌ തവണ നെഹ്രു ട്രോഫി സ്വന്തമാക്കിയ കുമരകം ടൗൺ ബോട്ട് ക്ലബ്‌ എത്തുക സെന്റ് പയസ് ചുണ്ടനിൽ. അവസാനമായി കുമരകത്തിന്റെ മണ്ണിൽ നെഹ്‌റു ട്രോഫി എത്തിച്ച വേമ്പനാട് ബോട്ട് ക്ലബ്‌ പായിപ്പാടാൻ ചുണ്ടനിലെത്തും. രണ്ടു തവണയാണ് വേമ്പനാട് നെഹ്രു ട്രോഫി ജേതാക്കളായത്. ചുരുങ്ങിയ കാലംകൊണ്ട് ഉയർന്നുവന്ന കൈപ്പുഴമുട്ട്‌ എൻസിഡിസി നടുഭാഗം ചുണ്ടനിലും ചുണ്ടൻവള്ളത്തിൽ കന്നിക്കാരായ സമുദ്ര ബോട്ട് ക്ലബ്‌ ജവഹർ തായങ്കരി ചുണ്ടനിലും മത്സരിക്കാനുണ്ടാകും. മുത്തേരിമടയിൽ വള്ളങ്ങൾ പരിശീലനം ആരംഭിച്ചിട്ടുണ്ട്‌. എല്ലാ വള്ളങ്ങളും ഒന്നിച്ചുള്ള ട്രയൽ നടക്കുന്ന 28ന് മുത്തേരിമട ഉത്സവഛായയിൽ മുങ്ങും.

 ചുണ്ടൻ കൂടാതെ അഞ്ച്‌ ചെറുവള്ളങ്ങളും ഇക്കുറി കുമരകത്തുനിന്ന്‌ പുന്നമടയിലെത്തുന്നുണ്ട്‌. പരിശീലനങ്ങൾ ആരംഭിച്ചതോടെ നാടെങ്ങും വള്ളംകളി ആവേശത്തിലമർന്നു. മൂന്ന് ഹാട്രിക്കുകൾ അടക്കം പതിനഞ്ചു തവണ കുമരകത്ത്‌ നെഹ്രു ട്രോഫി എത്തി. വേമ്പനാട്, സമുദ്ര, കുമരകം ബോട്ട് ക്ലബ്ബുകൾ മുത്തേരിമടയിലും ടൗൺ, എൻസിഡിസി എന്നിവർ തൊള്ളായിരം തോട്ടിലുമാണ്‌ പരിശീലനം നടത്തുന്നത്.

പന്തൽനിർമാണം തുടങ്ങി