കേന്ദ്ര അവഗണനയ്‌ക്ക്‌ കേരളത്തിന്റെ താക്കീത്‌

ആലപ്പുഴ

കേരളത്തോട്‌ കേന്ദ്രസർക്കാരിന്റെ വിവേചനവും സംസ്ഥാനങ്ങളുടെ അധികാരങ്ങൾ കൈക്കലാക്കാൻ ശ്രമിക്കുന്നതും ചെറുക്കണമെന്ന് സിപിഐ എം കേന്ദ്രകമ്മിറ്റിയം​ഗം ഡോ. ടി എം തോമസ് ഐസക്. കേന്ദ്ര അവഗണനയ്‌ക്കെതിരെ എൽഡിഎഫ്‌ സംഘടിപ്പിച്ച പ്രതിഷേധധർണ ഉദ്ഘാടനംചെയ്യുകയായിരുന്നു അദ്ദേഹം. നാടിന്റെ അവകാശങ്ങൾക്ക്  പോരാടുന്നത് എൽഡിഎഫാണ്. കേരളത്തിന്റെ വികസനത്തെ അവഗണിക്കുന്ന ബിജെപിക്കും ചൂട്ടുപിടിക്കുന്ന കോൺ​ഗ്രസിനും ഇവിടെ സ്ഥാനമുണ്ടാകില്ല. 

   നാനാത്വത്തിൽ ഏകത്വമെന്ന രീതി തിരസ്‍കരിക്കുന്ന പാർടിയാണ് ഇന്ന് ഇന്ത്യ ഭരിക്കുന്നത്. ഇത്തരം സമീപനം കേരളംപോലെയുള്ള സംസ്ഥാനങ്ങളെയാണ് ബാധിക്കുന്നത്. കാരണം നമ്മൾ വേറിട്ട് നടക്കുന്നവരാണ്.

ദേശീയപാത ആറുവരിയാക്കാൻ മറ്റെല്ലായിടത്തും ചെലവ് വഹിക്കുന്നത് കേന്ദ്രസർക്കാരാണ്. കേരളത്തിൽ ഭൂമിയേറ്റെടുക്കുന്നതിന് തുക സംസ്ഥാനം നൽകണം.   സംസ്ഥാനങ്ങളുമായി പങ്കുവയ്‍ക്കേണ്ട നികുതികൾ കൂട്ടാതെ മറ്റുള്ളവ വർധിപ്പിച്ച് തരാതിരിക്കുകയാണ് കേന്ദ്രം. എയിംസ് തരുമെന്ന് പറഞ്ഞു, കഞ്ചിക്കോട് ഫാക്‍ടറി തരുമെന്ന് പറഞ്ഞു, ഇതെല്ലാം എവിടെ?. മുംബൈ, പുണെ അതിവേ​ഗ ട്രെയിനുണ്ടല്ലോ, വേറെ മൂന്നെണ്ണം നിർമിക്കുകയല്ലേ, നഷ്‌ടമാണെങ്കിൽ എന്തിനാണ് അവിടെയൊക്കെ നിർമിക്കുന്നത്.   25 വർഷം കഴിഞ്ഞുള്ള കേരളത്തെക്കുറിച്ചാണ് നമ്മൾ സംസാരിക്കുന്നത്. കർഷകസമരം കൃഷിക്കാരുടെ മനസിൽ മാറ്റംവരുത്തി  –- അദ്ദേഹം പറഞ്ഞു.