കലക്ടറേറ്റിൽ ‘വെരുകിന്റെ കളി’

 

കൽപ്പറ്റ 

കലക്ടറേറ്റിൽ കയറിയ വെരുകിനെ വനപാലകർ പിടികൂടി. വ്യാഴം പകൽ പതിനൊന്നോടെയാണ് കലക്ടറേറ്റിലെ  കോൺഫറൻസ് ഹാളിന് മുമ്പിൽ  വെരുക്‌ എത്തിയത്‌.  വന്നവഴി മടങ്ങുമെന്ന്‌ കരുതി.  

 എന്നാൽ മാർബിൾ തറയിലൂടെ യാത്ര ബുദ്ധിമുട്ടായി. പിന്നെ യഥാർഥത്തിൽ  ‘വെരുകിന്റെ കളി’യായി.  വെപ്രാളമായി.  ഒടുവിൽ ജീവനക്കാർ വനംവകുപ്പ് അധികൃതരെ വിവരമറിയിച്ചു. വനം വകുപ്പ് ആർആർടി സംഘമെത്തി വെരുകിനെ പിടികൂടി ചാക്കിലാക്കി സുരക്ഷിത ഇടത്തേക്ക് കൊണ്ടുപോയി. അരമണിക്കൂറോളം കലക്ടറേറ്റിൽ വെരുകിന്റെ കളിയായിരുന്നു.