ജീവൻവച്ച്‌ കളിക്കരുത്‌

സ്വന്തം ലേഖകൻ

കൊല്ലം

‘പൊരിവെയിലത്ത് ചുട്ടുപഴുത്ത റോഡിൽ മാസ്‌കും ധരിച്ചു നിൽക്കുന്നത് നാടിന്റെ നന്മയ്ക്കായാണ്‌. ഞങ്ങളോട് തട്ടിക്കയറുന്നവർ ദയവായി ഓർക്കണം; കോവിഡിൽ നിന്ന്‌ നാടിനെ സംരക്ഷിക്കാനാണ്‌ ഓരോരുത്തരെയും വഴിയിൽ തടയുന്നത്‌’–- കൊല്ലം ഈസ്റ്റ് സ്റ്റേഷനിലെ സിവിൽ പൊലീസ് ഓഫീസർ ജലജയുടേതാണ്‌ വാക്കുകൾ. 

ദേശീയപാതയിലെ ഡ്യൂട്ടി പോയിന്റിലെത്താൻ പുലർച്ചെ നാലിന്‌ ഉണരും. ചെയ്യാവുന്ന വീട്ടുജോലികൾ ചെയ്ത് ബാക്കിയുള്ളവ സുഖമില്ലാത്ത അമ്മയുടെ ചുമലിലാക്കിയാണ് രാവിലെ ആറിനു മുമ്പ് ഇവിടെ എത്തുന്നത്. ഇതിലൊന്നും ഒരു പ്രയാസവും തോന്നാറില്ല. എന്നാൽ, യാതൊരു നിയന്ത്രണവും വകവയ്ക്കാതെ റോഡിലിറങ്ങുന്ന ആളുകൾ ഉണ്ടാക്കുന്ന ബുദ്ധിമുട്ട്‌ ചില്ലറയല്ലെന്ന്‌ ജലജ പറഞ്ഞു. 

സാധനം വാങ്ങാൻ പോകുന്ന ഞങ്ങളെ തടയാൻ ആരാണ് അധികാരം തന്നതെന്ന് ചോദിച്ച്‌ കഴിഞ്ഞദിവസം ഒരു സർക്കാർ ജീവനക്കാരൻ തട്ടിക്കയറി. കൂടെയുള്ള എസ്‌ഐ എത്തി  ജീവനക്കാരന്റെ ഓഫീസറെ വിളിച്ചു വിവരം അറിയിക്കാമെന്നു പറഞ്ഞതോടെ അയാൾ ക്ഷമപറഞ്ഞ്‌ തിരിച്ചുപോയി. നിയന്ത്രണം പാലിച്ച് നിത്യോപയോഗ സാധനങ്ങൾ വാങ്ങാൻ ആവശ്യമായ സഹായം പൊലീസ് നൽകുന്നുണ്ടെന്ന് എസ്ഐ ജയിംസ് പറഞ്ഞു. ഭൂരിഭാഗം പേരും അത്യാവശ്യമൊന്നും ഇല്ലാതെയാണ്‌ റോഡിലിറങ്ങുന്നത്‌. ചൊവ്വാഴ്ച രാവിലെ ആശുപത്രിയിലുള്ള ബന്ധുവിന്റെ അടുത്തേക്ക്‌ പോകാനാണെന്നും പറഞ്ഞാണ്‌ ഒരു യുവാവ്‌ എത്തിയത്‌. യുവാവ്‌ പറഞ്ഞ ബന്ധുവിനെ ഫോണിൽ വിളിച്ചപ്പോൾ വീട്ടിൽ സുഖമായിരിക്കുന്നു എന്ന മറുപടിയാണ്‌ ലഭിച്ചത്‌. കഠിനമായ ജോലിക്കിടയിലും സർക്കാരിന്റെ കരുതൽ പൊലീസിനൊപ്പം ഉണ്ടെന്നതാണ്‌ ആശ്വാസമെന്ന്‌ ഇവർ പറയുന്നു.