തിരുവനന്തപുരം
മുഖ്യമന്ത്രിയുടെയും മന്ത്രിമാരുടെയും നേതൃത്വത്തിലുള്ള മേഖലാതല അവലോകന യോഗങ്ങൾ ചൊവ്വാഴ്‌ച ആരംഭിക്കും. ഭരണ നേട്ടങ്ങൾ ജനങ്ങൾക്ക്‌ കൂടുതൽ അനുഭവവേദ്യമാക്കാനും സമയബന്ധിത പദ്ധതി നിർവഹണം ഉറപ്പാക്കാനുമായാണ്‌ സംസ്ഥാനത്ത്‌ നാല്‌ മേഖലാ യോഗങ്ങൾ നടത്തുന്നത്‌. ജില്ലകളിലെ പ്രശ്നങ്ങൾക്ക്‌ പരിഹാരം കാണുന്നതിനും വികസന പ്രവർത്തനങ്ങൾ വേഗത്തിലാക്കുന്നതിനുമുള്ള നടപടികളുമുണ്ടാകും.
ആദ്യ അവലോകനയോഗം ചൊവ്വ രാവിലെ 9.30ന് തിരുവനന്തപുരം ജിമ്മി ജോർജ് ഇൻഡോർ സ്റ്റേഡിയത്തിൽ ആരംഭിക്കും. തിരുവനന്തപുരം, കൊല്ലം, പത്തനംതിട്ട ജില്ലകളുടെ അവലോകനമാണ്‌ നടക്കുക. പകൽ 1.30 വരെ പ്രമുഖ പദ്ധതികളുടെയും പരിപാടികളുടെയും അവലോകനം. വൈകിട്ട് 3.30 മുതൽ അഞ്ചുവരെ പൊലീസ് ഓഫീസർമാരുടെ യോഗത്തിൽ ക്രമസമാധാന പ്രശ്നങ്ങൾ വിലയിരുത്തും.
29ന് പാലക്കാട്, മലപ്പുറം, തൃശൂർ ജില്ലകളുടെ അവലോകനം തൃശൂർ ഈസ്റ്റ് ഫോർട്ട് ലൂർദ് ചർച്ച് ഹാളിൽ നടക്കും. എറണാകുളം, ഇടുക്കി, ആലപ്പുഴ, കോട്ടയം ജില്ലകളുടെ അവലോകന യോഗം ഒക്ടോബർ മൂന്നിന് എറണാകുളം ബോൾഗാട്ടി പാലസിലായിരിക്കും. കാസർകോട്‌, കണ്ണൂർ, വയനാട്, കോഴിക്കോട് ജില്ലകളുടെ അവലോകനയോഗം ഒക്ടോബർ അഞ്ചിന് കോഴിക്കോട് മറീന കൺവൻഷൻ സെന്ററിൽ ചേരും.
ജനങ്ങളുടെ പരാതികളിൽ അതിവേഗ പരിഹാരത്തിന്‌ മേഖലാ യോഗങ്ങൾ മുൻഗണന നൽകും. അടിസ്ഥാന സൗകര്യ വികസനമുൾപ്പെടെയുള്ള പദ്ധതികളുടെ നിർവഹണ വിലയിരുത്തലുണ്ടാകും. മേഖലയിലെ പൊതുവായ വികസന പ്രശ്നങ്ങൾ പരിശോധിച്ച്‌ പരിഹാരങ്ങൾ ഉറപ്പുവരുത്തും. സർക്കാരിന്റെ വിവിധ ക്ഷേമ പദ്ധതികൾ വകുപ്പുദ്യോഗസ്ഥരുടെയും ജില്ലാ അധികൃതരുടെയും സാന്നിധ്യത്തിൽ വിലയിരുത്തും. ജനങ്ങളിലേക്ക് ഇറങ്ങിച്ചെന്ന് വികസനപ്രക്രിയ കൂടുതൽ സക്രിയമാക്കാനുള്ള നടപടികളുടെ ഭാഗമായാണ്‌ മുഖ്യമന്ത്രിതന്നെ മുന്നിൽനിന്ന്‌ മേഖലാതല അവലോകനം സംഘടിപ്പിക്കു
ന്നത്‌.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
