കൊല്ലം > കൊല്ലം –- എഗ്മോർ എക്സ്പ്രസ് ട്രെയിനിന്റെ കോച്ചിനടിയിൽ വിള്ളൽ കണ്ടെത്തി. വൻ അപകടം ഒഴിവായി. കൊല്ലത്തുനിന്ന് ഞായർ പകൽ 12.15ന് പുറപ്പെട്ട ട്രെയിൻ മൂന്നിനു ശേഷം ചെങ്കോട്ട റെയിൽവെ സ്റ്റേഷനിലെത്തിയപ്പോഴാണ് എസ് 3 കോച്ചിന്റെ അടിഭാഗത്ത് വിള്ളൽ കണ്ടത്.
ട്രെയിനുകൾ നിശ്ചിത ദൂരം പിന്നിടുമ്പോൾ നടത്തുന്ന പതിവ് പരിശോധനയിലാണ് വിള്ളൽ ശ്രദ്ധയിൽപ്പെട്ടത്. തുടർന്ന് ഈ ബോഗി ട്രെയിനിൽനിന്ന് വേർപ്പെടുത്തി. യാത്രക്കാരെ മറ്റൊരു ബോഗിയിലേക്ക് മാറ്റി. ഒരു മണിക്കൂറിലേറെ വൈകിയാണ് ചെങ്കോട്ടയിൽനിന്ന് യാത്ര പുറപ്പെടുന്നത്. ചെങ്കോട്ടയ്ക്കും മധുരയ്ക്കും ഇടയിൽ എസ് 3 കോച്ചിൽ റിസർവേഷനുള്ള യാത്രക്കാരോട് എസ് 4ൽ കയറാൻ സ്റ്റേഷനുകളിൽ അറിയിപ്പ് നൽകി.
മധുര റെയിൽവേ സ്റ്റേഷനിൽ എത്തിയശേഷം മറ്റൊരു കോച്ച് ഘടിപ്പിച്ചാണ് ട്രെയിൻ എഗ്മോറിലേക്ക് യാത്ര തുടർന്നത്. കോച്ചിലെ വിള്ളൽ ശ്രദ്ധയിൽപ്പെട്ടില്ലായിരുന്നെങ്കിൽ വേഗത്തിൽ യാത്ര തുടരുന്ന ട്രെയിൻ അപകടത്തിൽപ്പെടാനുള്ള സാധ്യതയുണ്ടായിരുന്നു.
ദേശാഭിമാനി വാർത്തകൾ ഇപ്പോള് വാട്സാപ്പിലും ടെലഗ്രാമിലും ലഭ്യമാണ്.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..