തിരുവനന്തപുരം> കേരളത്തിലെമ്പാടും യുഡിഎഫ് നടത്തിക്കൊണ്ടിരിക്കുന്ന അക്രമണങ്ങൾക്കെതിരെ ബഹുജനങ്ങളെ അണിനിരത്തി സമാധാനപരമായി പ്രതിഷേധിക്കണമെന്ന് എൽഡിഎഫ് കൺവീനർ ഇ പി ജയരാജൻ. വയനാട്ടിൽ രാഹുൽ ഗാന്ധി എംപിയുടെ ഓഫീസിൽ ഉണ്ടായ ദൗർഭാഗ്യകരമായ സംഭവങ്ങളെ സീതാറാം യെച്ചൂരിയും, മുഖ്യമന്ത്രി പിണറായി വിജയനുൾപ്പെടെ തള്ളിപ്പറഞ്ഞതാണ്. എൽഡിഎഫും ഈ സംഭവത്തെ അപലപിച്ചു. പൊലീസും ശക്തമായ നടപടി സ്വീകരിച്ചുവരികയാണ്.
അതേസമയം മുഖ്യമന്ത്രിയെ വിമാനത്തിൽവെച്ച് അക്രമിച്ച സംഭവത്തെ അപലപിക്കാൻ യുഡിഎഫ് നേതൃത്വം ഇതുവരെ തയ്യാറായിട്ടില്ല. മാത്രമല്ല അക്രമകാരികളെ മാലയിട്ട് സ്വീകരിക്കുന്ന സമീപനമാണ് അവരിൽ നിന്നുണ്ടായത്‌. രണ്ട് സമീപനങ്ങൾ തമ്മിലുള്ള വ്യത്യാസമാണ് ഇതിലൂടെ പുറത്ത് വന്നത്.പത്ര പ്രവർത്തകരെ പ്രതിപക്ഷ നേതാവ് തന്നെ ഭീഷണിപ്പെടുത്തുകയാണ്‌. വയനാട്ടിൽ ദേശാഭിമാനിക്ക് നേരെയും അക്രമണമുണ്ടായി.
കണ്ണൂരിൽ മാരകായുധങ്ങളുമായി പൊലീസിനെ അക്രമിക്കാനുള്ള തയ്യാറെടുപ്പാണ് യുഡിഎഫുകാരുടെ ഭാഗത്തുനിന്നുണ്ടായത്. സംസ്ഥാനത്തെമ്പാടും കലാപം അഴിച്ചുവിടാനും, പത്രക്കാരെ ഭീഷണിപ്പെടുത്താനും, പത്ര സ്ഥാപനത്തേയും അക്രമിക്കാനുമുള്ള ഈ പരിശ്രമത്തിനെതിരെ ജനാധിപത്യ വിശ്വാസികൾ പ്രതിഷേധിക്കണമെന്നും ഇ പി ജയരാജൻ പ്രസ്താവനയിൽ പറഞ്ഞു.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
