29 March Friday

"തണ്ടൊടിഞ്ഞ താമരയിൽ'; ആഹായിലെ പ്രണയഗാനം പുറത്തിറങ്ങി

വെബ് ഡെസ്‌ക്‌Updated: Wednesday Feb 17, 2021

സാസ പ്രൊഡക്ഷൻസിന്റെ ബാനറിൽ പ്രേം എബ്രഹാം നിർമിച്ച്  ബിബിൻ  പോൾ സാമുവൽ സംവിധാനം ചെയ്യുന്ന ആഹാ എന്ന ചിത്രത്തിലെ 'തണ്ടൊടിഞ്ഞ താമരയിൽ' എന്ന  പ്രണയഗാനം പുറത്തിറങ്ങി. സയനോര ഫിലിപ്പും വിജയ് യേശുദാസും ചേർന്നുപാടിയ ഗാനത്തിന്റെ സംഗീത സംവിധാനവും രചനയും നിർവഹിച്ചിരിക്കുന്നത് സയനോര തന്നെയാണ്. സയനോര ഫിലിപ്പ് സംഗീത സംവിധാനം നിർവഹിക്കുന്ന മൂന്നാമത്തെ ചിത്രമാണ് ആഹാ. വ്യത്യസ്ത സ്വഭാവത്തിൽ പെടുന്ന നാല് ഗാനങ്ങളാണ് ആഹായ്ക്ക് വേണ്ടി സയനോര ഒരുക്കിയിരിക്കുന്നത്. മലയാള സിനിമ ലോകത്ത് ഒന്നാം നിര സംഗീത സംവിധായകരുടെ ഇടയിലേക്ക് സയനോരയും എത്തിയിരിക്കുകയാണ് ആഹയിലൂടെ.  

പ്രണയദിനത്തോട് അനുബന്ധിച്ചാണ് ചിത്രത്തിലെ ഈ അതിമനോഹരമായ പ്രണയഗാനം പുറത്തിറങ്ങുന്നത് എന്നത് മറ്റൊരു പ്രത്യേകതയാണ്. ചിത്രത്തിലെ കേന്ദ്ര കഥാപാത്രങ്ങളായെത്തുന്ന ഇന്ദ്രജിത്തും ശാന്തിയും തമ്മിലുള്ള കാവ്യാത്മകമായ പ്രണയത്തെ പ്രതിനിധീകരിക്കുന്ന ഗാനമാണിത്. പുറത്തിറങ്ങി ഉടൻ തന്നെ സിനിമ പ്രേക്ഷകരും സമൂഹ മാധ്യമങ്ങളും ഈ ഗാനത്തെ ഏറ്റെടുത്ത് കഴിഞ്ഞു. അതിമനോഹരമായ ഛായാഗ്രഹണത്തിൽ എത്തിയിരിക്കുന്ന ഗാനം വരാനിരിക്കുന്ന ദൃശ്യവിരുന്നിന്റെ സൂചനയുമായാണ് പുറത്തിറങ്ങിയത്. സിനിമക്കകത്തും പുറത്തുമുള്ള നിരവധി പേരാണ് ചുരുങ്ങിയ സമയം കൊണ്ട് തന്നെ ഗാനം സമൂഹ മാധ്യമങ്ങളിൽ പങ്കു വെച്ചത്.  കേരളത്തിന്റെ തനത് കായിക വിനോദമായ വടംവലിയെ കഥാതന്തുവാക്കി, സംഗീതത്തിനും, പ്രണയത്തിനും, കുടുംബ ബന്ധങ്ങൾക്കുമെല്ലാം ഒരുപാട് പ്രാധാന്യമുള്ള കഥയുമായെത്തുന്ന ആഹാ ഒരു മുഴു നീള സ്പോർട്സ് ഡ്രാമയാണ്.

84 ഇൽ അധികം ലൊക്കേഷനുകളിലായി ആറായിരത്തിലധികം ജൂനിയർ ആർട്ടിസ്റ്റുകളെ അണിനിരത്തി 62 ദിവസങ്ങൾ കൊണ്ടാണ് ആഹയുടെ ചിത്രീകരണം പൂർത്തീകരിച്ചത്. വടംവലി എന്ന വാക്കിന് പുതിയ പര്യായ പദം പോലെ ആഹ നീലൂർ എന്ന ടീമിന്റെ കഥയിൽ നിന്നും ഊർജം ഉൾക്കൊണ്ടാണ് ആഹ പ്രദർശനത്തിനൊരുങ്ങുന്നത്.  കുറച്ച് മാസങ്ങൾക്ക് മുന്നേ ഇറങ്ങിയ ആഹയുടെ ടീസറും, ഈയടുത്ത് വന്ന അർജുൻ അശോകൻ ആലപിച്ച 'കടംകഥയായ്' എന്ന തീം സോങ്ങും സമൂഹ മാധ്യമങ്ങളിൽ തരംഗമായിരുന്നു.


ആഹാ നിർമിച്ചിരിക്കുന്നത് സാസ പ്രൊഡക്ഷൻസിന്റെ ബാനറിൽ പ്രേം എബ്രഹാം ആണ്. ടോബിത് ചിറയത് തിരക്കഥയും സംഭാഷണവും ഒരുക്കിയിരിക്കുന്നു. സിനിമാലോകത്തെ സജീവ സാന്നിധ്യമായ, ബോളിവുഡിലും മറ്റും നിരവധി ചിത്രങ്ങളുടെ ഭാഗമായ  രാഹുൽ ബാലചന്ദ്രനാണ് ഛായാഗ്രഹണം നിർവഹിച്ചിരിക്കുന്നത്. ഇന്ദ്രജിത്ത് സുകുമാരൻ കേന്ദ്ര കഥാപാത്രമാകുന്ന ചിത്രത്തിൽ ശാന്തി ബാലചന്ദ്രൻ ആണ് നായികാ കഥാപാത്രത്തെ അവതരിപ്പിക്കുന്നത്. അമിത് ചക്കാലക്കൽ, അശ്വിൻ കുമാർ, മനോജ് കെ ജയൻ, സിദ്ധാർത്ഥ ശിവ, ജയശങ്കർ എന്നിങ്ങനെ നിരവധി അഭിനേതാക്കൾ അണിനിരക്കുന്നുണ്ട്. ദിവസങ്ങളോളം നീണ്ട കഠിന പരിശീലനത്തിനൊടുവിലാണ് ഇന്ദ്രജിത്ത് അടക്കമുള്ള സിനിമാ താരങ്ങളും വടം വലിയിലെ യഥാർത്ഥ ഹീറോകളും, മറ്റ്  അഭിനേതാക്കളും ചേർന്ന് ആഹായിലെ കഥാപാത്രങ്ങളായി പ്രേക്ഷകർക്ക് മുന്നിലേക്കെത്തുന്നത്. സയനോര ഫിലിപ്പ് സംഗീത സംവിധായികയും, ഷംജിത് രവി ആർട് ഡയറക്ടറുമാണ്. സംവിധായകൻ ബിബിൻ പോൾ സാമുവൽ തന്നെ ആണ് ആഹായുടെ എഡിറ്റർ . റോണക്സ് സേവിയർ ആഹായുടെ മേക്കപ്പ് കൈകാര്യം ചെയ്തിരിക്കുന്നത്.

 


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..



മറ്റു വാർത്തകൾ

----
പ്രധാന വാർത്തകൾ
-----
-----
 Top