സാമ്രാജ്യത്വവിരുദ്ധ പോരാട്ടങ്ങൾക്ക് നേതൃത്വം നൽകിയ കട്ടിലശ്ശേരി മുഹമ്മദ് മുസ്ലിയാരുടെയും എം പി നാരായണമേനോന്റെയും ജന്മദേശം. സി എച്ച് മുഹമ്മദ് കോയ, പാലോളി മുഹമ്മദ്കുട്ടി, കൊരമ്പയിൽ അഹമ്മദ് ഹാജി തുടങ്ങിയ പ്രമുഖർ അങ്കംകുറിച്ച മണ്ണ്‌. മങ്കട, മക്കരപ്പറമ്പ്, അങ്ങാടിപ്പുറം, കൂട്ടിലങ്ങാടി, കുറുവ, മൂർക്കനാട്, പുഴക്കാട്ടിരി എന്നീ ഏഴു പഞ്ചായത്തുകൾ ചേർന്നതാണ് മണ്ഡലം. 11 തവണ മുസ്ലിംലീഗും മൂന്നു‌തവണ ഇടതുപക്ഷവും വിജയിച്ചു. 1965ൽ പാലോളി മുഹമ്മദ്കുട്ടിയും 2001ലും 2006ലും എൽഡിഎഫ് സ്വതന്ത്രന്‍ മഞ്ഞളാംകുഴി അലിയുമാണ് ഇടതുപക്ഷത്തുനിന്ന്‌ ജയിച്ചത്‌. 2001ൽ കെ പി എ മജീദും 2006ൽ എം കെ മുനീറും തോൽവിയറിഞ്ഞു. 2011ൽ ലീഗിലെ ടി എ അഹമ്മദ് കബീർ മണ്ഡലം തിരിച്ചുപിടിച്ചു. 2016ൽ എൽഡിഎഫിലെ അഡ്വ. ടി കെ റഷീദലിയോട് കഷ്ടിച്ചാണ് അഹമ്മദ് കബീർ രക്ഷപ്പെട്ടത്, ഭൂരിപക്ഷം 1508. യുഡിഎഫ് ഭൂരിപക്ഷം 2019ലെ ലോക്‌സഭാ തെരഞ്ഞെടുപ്പിനേക്കാൾ ഇത്തവണത്തെ തദ്ദേശ തെരഞ്ഞെടുപ്പിൽ കുറഞ്ഞു. രൂപീകരണംമുതൽ മുസ്ലിംലീഗ് മാത്രം ഭരിക്കുന്ന കുറുവ പഞ്ചായത്തിൽ എൽഡിഎഫ് വലിയ മുന്നേറ്റമുണ്ടാക്കി. വെൽഫെയർ പാർടിയുടെ പരസ്യ പിന്തുണയാണ് ലോക്‌സഭാ–തദ്ദേശ തെരഞ്ഞെടുപ്പുകളിൽ യുഡിഎഫിന് നേട്ടമുണ്ടാക്കിക്കൊടുത്തത്. എംഎൽഎ വികസന പ്രവർത്തനങ്ങളോട് മുഖംതിരിഞ്ഞ് നിന്നപ്പോഴും മണ്ഡലത്തിൽ സംസ്ഥാന സർക്കാർ നടപ്പാക്കിയ വികസന പ്രവർത്തനങ്ങൾ നിരവധി. ആറ് പഞ്ചായത്തുകളിൽ കുടിവെള്ളമെത്തിക്കാൻ മൂർക്കനാട് കുടിവെള്ള പദ്ധതി ഒരുങ്ങി. മങ്കട ഗവ. കോളേജിന് മൂർക്കനാട് പുന്നക്കാട്ട് കിഫ്‌ബിയിൽനിന്ന്‌ ഫണ്ടും പുതിയ പിജി കോഴ്‌സും അനുവദിച്ചു.
