തിരുവനന്തപുരം
വെല്ലൂർ ക്രിസ്ത്യൻ മെഡിക്കൽ കോളേജിൽ പ്രവേശനത്തിന് മാർച്ച്‌ 26 വരെ ഓൺലൈനായി അപേക്ഷിക്കാം. എംബിബിഎസ്, നേഴ്‌സിങ്‌, പാരാമെഡിക്കൽ കോഴ്സുകളിലാണ് പ്രവേശനം. അഖിലേന്ത്യാ മെഡിക്കൽ പ്രവേശന പരീക്ഷയായ നീറ്റ് പട്ടികയിൽ ഉൾപ്പെടുന്നവരിൽ നിന്നായിരിക്കും എംബിബിഎസ് പ്രവേശനം. മറ്റു കോഴ്സുകൾക്ക് പ്രവേശനപരീക്ഷയുടെ അടിസ്ഥാനത്തിലാണ് അഡ്മിഷൻ.
അപേക്ഷയുടെ പ്രിന്റൗട്ട് അനുബന്ധരേഖ സഹിതം ഏപ്രിൽ രണ്ടിനകം അയച്ചു കൊടുക്കണം. എംബിബിഎസിന് അപേക്ഷിക്കുന്നവർ നീറ്റ് യുജി സ്കോർ ഫലം പ്രഖ്യാപിച്ച്‌ രണ്ടാഴ്ചയ്ക്കകം ഓൺലൈനായി സമർപ്പിക്കണം. ആകെയുള്ള കോഴ്സുകളെ ഗ്രൂപ്പ് എ, ഗ്രൂപ്പ് ബി എന്ന് രണ്ടായി തിരിച്ചിട്ടുണ്ട്. എംബിബിഎസ്, ബിഎസ്‌സി നേഴ്സിംഗ്, മെഡിക്കൽ അനുബന്ധ കോഴ്സുകളാണ് ഗ്രൂപ്പ് എയിൽ ഉൾപ്പെടുത്തിയിരിക്കുന്നത്. നേഴ്സിംഗ് ഡിപ്ലോമ, അനുബന്ധ മെഡിക്കൽ ഡിപ്ലോമ കോഴ്‌സുകൾ, മാസ്റ്റർ ഓഫ് പബ്ലിക് ഹെൽത്ത്, എംഎസ്‌സി കോഴ്സുകളാണ് ഗ്രൂപ്പ് ബിയിൽ.
ബിഎസ്‌സി നേഴ്സിംഗ് ടെസ്റ്റും ഇന്റർവ്യൂവും ജൂലൈ 20നും 22നും. ആഗസ്റ്റ് നാലിന് ഫലം പ്രഖ്യാപിക്കും. പാരാമെഡിക്കൽ ബിരുദ കോഴ്സുകളുടെ പ്രവേശന പരീക്ഷ ജൂലൈ 23 നും 24നും. ഫലം 25ന്. നേഴ്സിംഗ് ഡിപ്ലോമ കോഴ്സ് പ്രവേശനപരീക്ഷ ജൂലൈ 28, 30. ഫലം ആഗസ്റ്റ് ആറിന്. പാരാമെഡിക്കൽ പിജി ഡിപ്ലോമ, എംഎച്ച്എ, എംഎസ്‌സി പ്രവേശനപരീക്ഷ ആഗസ്റ്റ് 4, 5. ഫലം ആഗസ്റ്റ് ആറിന്. എംപിഎച്ച് പ്രവേശനപരീക്ഷയും ഇന്റർവ്യൂവും മേയ് 25നും 26 നും നടത്തി മെയ്‌ 27ന് ഫലം പ്രഖ്യാപിക്കും.
2020 ഡിസംബർ 31ന് 17 വയസ്സ്‌ പൂർത്തിയാകണം. നേഴ്സിംഗ് കോഴ്സിനുള്ള ഉയർന്ന പ്രായപരിധി 30. പ്ലസ്ടു പാസായവർക്കും അവസാനവർഷ വിദ്യാർഥികൾക്കും അപേക്ഷിക്കാം. ഫിസിക്സ്, കെമിസ്ട്രി, ബയോളജി, ഇംഗ്ലീഷ് വിഷയങ്ങൾ പഠിച്ചിരിക്കണം. ബിഎസ്‌സി നേഴ്സിംഗ് പ്രവേശനം ആഗ്രഹിക്കുന്നവർ 45 ശതമാനം മാർക്കോടെ പ്ലസ്ടു പാസായവരും അവിവാഹിതരായ പെൺകുട്ടികളുമായിരിക്കണം.
കോഴ്‌സുകൾ
ബിഒടി, ബിപിടി, ബിഎസ്‌സി എംഎൽടി, ബിഎസ്‌സി ഒപ്ടോമെട്രി ടെക്നോളജി, ബിഎസ്‌സി മെഡിക്കൽ റെക്കോഡ്സ് സയൻസ്, ബാച്ചിലർ ഓഫ് ഓഡിയോളജി ആൻഡ് സ്പീച്ച് ലാംഗ്വേജ് പത്തോളജി, ബിഎസ്‌സി ക്രിട്ടിക്കൽ കെയർ ടെക്നോളജി, ബിഎസ്‌സി ഡയാലിസിസ് ടെക്നോളജി, ബിഎസ്‌സി ന്യൂക്ലിയർ മെഡിസിൻ ടെക്നോളജി, ബിഎസ്‌സി പ്രോസ്തെറ്റിക്സ് ആൻഡ് ഓർത്തോഡോണ്ടിക്സ്, ബിഎസ്‌സി റേഡിയോളജി ആൻഡ് ഇമേജിംഗ് ടെക്നോളജി, ബിഎസ്‌സി റേഡിയോ തെറാപ്പി ടെക്നോളജി, ബിഎസ്‌സി മെഡിക്കൽ സോഷ്യോളജി, ബിഎസ്‌സി കാർഡിയോ പൾമനറി പെർഫ്യൂഷൻ കെയർ ടെക്നോളജി, ബിഎസ്‌സി ഓപ്പറേഷൻ തിയറ്റർ ആൻഡ് അനസ്തേഷ്യാ ടെക്നോളജി, ബിഎസ്‌സി ന്യൂറോ ഇലക്ട്രോസൈക്കോളജി, ബിഎസ്‌സി ആക്സിഡന്റ്‌ ആൻഡ് എമർജൻസി കെയർ ടെക്നോളജി, ബിഎസ്‌സി കാർഡിയാക് ടെക്നോളജി എന്നിവയാണ്‌ പാരാമെഡിക്കൽ വിഭാഗത്തിൽപ്പെട്ട ബിരുദ കോഴ്‌സുകൾ. ഒരാൾക്ക് ഏഴ്‌ കോഴ്സുകൾക്കുവരെ അപേക്ഷിക്കാം.
ഡിപ്ലോമ, ബിരുദാനന്തര ബിരുദ ഡിഗ്രി, ബിരുദാനന്തര ബിരുദ ഡിപ്ലോമ കോഴ്സുകളാണ് ഗ്രൂപ്പ് ബി വിഭാഗത്തിലുള്ളത്. ഒരാൾക്ക് അഞ്ചു കോഴ്സുകൾക്കുവരെ അപേക്ഷിക്കാം. എപ്പിഡിമിയോളജി, ബയോസ്റ്റാറ്റിസ്റ്റിക്സ്, മെഡിക്കൽ ഫിസിക്സ്, പബ്ലിക് ഹെൽത്ത് എന്നിവയിലാണ്‌ മാസ്റ്റേഴ്സ് കോഴ്‌സുകൾ. മെഡിക്കൽ അനുബന്ധ മേഖലകളിൽ ബിരുദം നേടിയവർക്കും എംഎസ്‌സി നഴ്സിംഗ് പാസായവർക്കും എപ്പിഡിമിയോളജിയിൽ എംഎസ്‌സി കോഴ്സിന് അപേക്ഷിക്കാം. സ്റ്റാറ്റിസ്റ്റിക്സ് ഒരു വിഷയമായി പഠിച്ച് ബിരുദം നേടിയവർക്ക് എംഎസ്‌സി ബയോസ്റ്റാറ്റിസ്റ്റിക്സിനും ബിരുദതലത്തിൽ ഫിസിക്സ് പഠിച്ചവർക്ക്‌ മെഡിക്കൽ ഫിസിക്സ് കോഴ്സിനും അപേക്ഷിക്കാം. എംബിബിഎസ്, ബിഡിഎസ്, ബിഎസ്‌സി നഴ്സിംഗ്, ബിപിടി ബിഒടി, ബിഎഎംഎസ്, ബിഫാം, ബിടെക്, മാനേജ്മെന്റ്‌, നിയമം തുടങ്ങിയ വിഷയങ്ങളിൽ ബിരുദം നേടിയവർക്ക് മാസ്റ്റർ ഓഫ് പബ്ലിക് ഹെൽത്ത് കോഴ്സിന് അപേക്ഷിക്കാം.
പരീക്ഷാകേന്ദ്രങ്ങൾ
തിരുവനന്തപുരം, കോട്ടയം, കൊച്ചി, കോഴിക്കോട് എന്നിവയ്ക്കുപുറമെ ബംഗളൂരു, ഭുവനേശ്വർ, ചെന്നൈ, ഡൽഹി, ഗോഹട്ടി, ഹൈദരാബാദ്, കോൽക്കത്ത, ലക്നോ, മധുര, മുംബൈ, പോണ്ടിച്ചേരി, സേലം, വെല്ലൂർ, വിജവാഡ, പെനാംഗ് (മലേഷ്യ) പ്രവേശനപരീക്ഷാ കേന്ദ്രങ്ങളാണ്.
120 മിനിറ്റ് ദൈർഘ്യമുള്ള കംപ്യൂട്ടർ അധിഷ്ഠിത പ്രവേശനപരീക്ഷയാണ്‌ നടത്തുന്നത്. ഫിസിക്സ്, കെമിസ്ട്രി, ബയോളജി എന്നിവയിൽനിന്നുള്ള ചോദ്യങ്ങൾക്കു പുറമെ ജനറൽ എബിലിറ്റി, ആനുകാലികവിഷയങ്ങൾ എന്നിവയിൽനിന്ന്‌ ചോദ്യങ്ങൾ ഉണ്ടായിരിക്കും. അപേക്ഷാഫോം, മാതൃകാ ചോദ്യപേപ്പർ എന്നിവയ്ക്കും വെബ്സൈറ്റ് സന്ദർശിക്കുക. വെബ്സൈറ്റ്: https://admissions.cmcvellore.ac.in
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
