19 May Thursday

തൊഴിലാളിവർഗത്തിന്റെ പ്രിയനേതാവ് - കോടിയേരി ബാലകൃഷ്‌ണൻ എഴുതുന്നു

വെബ് ഡെസ്‌ക്‌Updated: Wednesday Jan 19, 2022


ഇന്ത്യൻ തൊഴിലാളിവർഗത്തിന്റെ നിസ്വാർഥനായ ദേശീയ നേതാവായിരുന്നു ഇ ബാലാനന്ദൻ. കേരളം ഇന്ത്യക്ക് സംഭാവനചെയ്ത പ്രമുഖ തൊഴിലാളി നേതാവായിരുന്ന സഖാവ് നമ്മെ വിട്ടുപിരിഞ്ഞിട്ട് ഇന്ന് പതിമൂന്ന്‌ വർഷമാകുന്നു. സംസ്ഥാനത്തെ തൊഴിലാളിവർഗ പ്രസ്ഥാനത്തിന്റെ ആദ്യപഥികരിൽ ഒരാളാണ്. അലുമിനിയം കമ്പനിയിലെ കൂലിത്തൊഴിലാളിയിൽനിന്ന് രാജ്യത്തെ ട്രേഡ് യൂണിയൻ പ്രസ്ഥാനത്തിന്റെ അമരക്കാരനായി വളർന്ന അസാധാരണ വിപ്ലവ ഏടാണ് ആ ജീവിതം. കൊല്ലം ജില്ലയിലെ ശക്തികുളങ്ങരയിൽ ഒരു ദരിദ്ര തൊഴിലാളി കുടുംബത്തിൽ 1924ൽ ജനനം. ജീവിതപ്രാരാബ്ധംകാരണം നന്നേ ചെറുപ്പത്തിലേ തൊഴിലെടുക്കാൻ നിർബന്ധിതനായി. ഷാപ്പുതൊഴിലാളി, കൂലിപ്പണിക്കാരൻ എന്നിങ്ങനെയെല്ലാം ജീവിതവഴി തേടുന്നതിനിടെ ഏലൂരിലെ അലുമിനിയം കമ്പനിയിൽ പണിക്കാരനായി. പിന്നീടുണ്ടായത് പുതിയ ചരിത്രം. തൊഴിലാളിവർഗ രാഷ്ട്രീയത്തിന്റെ ബാലപാഠം അവിടത്തെ പണിശാലയിൽനിന്ന് പഠിച്ചു. അലുമിനിയം ഫാക്ടറി വർക്കേഴ്സ് യൂണിയൻ രൂപീകരിക്കപ്പെട്ടു. അതിന്റെ ആദ്യത്തെ ജനറൽ സെക്രട്ടറിയായി. തിരുവിതാംകൂറിൽ രജിസ്റ്റർ ചെയ്യുന്ന ആറാമത്തെ തൊഴിലാളി യൂണിയനായിരുന്നു അത്. ആദ്യം കോൺഗ്രസ് പ്രവർത്തകനായിരുന്ന അദ്ദേഹം 1943ൽ കമ്യൂണിസ്റ്റ് പാർടിയുടെ ആലുവ സെൽ രൂപീകരിച്ചപ്പോൾ അതിലെ അംഗമായി. തൊഴിലാളികളുടെ അവകാശങ്ങൾക്കുവേണ്ടി ശബ്ദമുയർത്തിയതിനെത്തുടർന്ന് കമ്പനിയിൽനിന്ന് പുറത്താക്കി. ഫാക്ടറിയിൽനിന്ന് പുറത്താക്കപ്പെട്ട അദ്ദേഹം പൂർണസമയ പാർടി പ്രവർത്തകനായി.

കമ്യൂണിസ്റ്റ് പ്രസ്ഥാനത്തിനെതിരെ നുണപ്രചാരണം ശക്തിപ്പെട്ടപ്പോൾ അതിനെതിരെ കുറിക്കുകൊള്ളുന്ന ഭാഷയിൽ, ഒളിവിലിരിക്കെ പൊതുയോഗത്തിൽ പ്രസംഗിച്ച് മറുപടി നൽകി. അതേത്തുടർന്ന് പൊലീസ് അറസ്റ്റ് ചെയ്തു. വിവിധ ഘട്ടങ്ങളിലായി അഞ്ചുവർഷം ജയിൽവാസവും നാലരവർഷത്തോളം ഒളിവുജീവിതവും നയിച്ചു. ഭീകരമായ പൊലീസ് മർദനത്തിന് നിരവധി തവണ ഇരയായി. സിപിഐ എം രൂപീകരിച്ചപ്പോൾ പാർടിയുടെ സംസ്ഥാന കമ്മിറ്റിയംഗമായി. പിന്നീട് സംസ്ഥാന സെക്രട്ടറിയറ്റംഗവുമായി. 1972ൽ മധുരയിൽ ചേർന്ന ഒമ്പതാം പാർടി കോൺഗ്രസിലാണ് കേന്ദ്ര കമ്മിറ്റിയംഗമായത്. 1978ൽ ജലന്ധർ പാർടി കോൺഗ്രസിൽ പൊളിറ്റ്ബ്യൂറോ അംഗമായി തെരഞ്ഞെടുക്കപ്പെട്ടശേഷം മൂന്ന് പതിറ്റാണ്ടോളം ഡൽഹി കേന്ദ്രമാക്കി പ്രവർത്തിച്ചു. എ കെ ജിക്കും ഇ എം എസിനുംശേഷം പാർടി പിബിയിലെത്തിയ മലയാളിയായിരുന്നു അദ്ദേഹം.
തൊഴിലാളികളെ വിപ്ലവപാതയിലേക്ക് കൊണ്ടുവരുന്നതിനും അവരുടെ അവകാശപ്പോരാട്ടങ്ങളെ ശക്തമാക്കുന്നതിനും സിഐടിയു നേതാവെന്ന നിലയിൽ വഹിച്ച പങ്ക് എന്നും സ്മരിക്കപ്പെടുന്നതാണ്. 1970ൽ സിഐടിയു രൂപീകരിച്ചപ്പോൾ അതിന്റെ സംസ്ഥാന ജനറൽ സെക്രട്ടറിയും തുടർന്ന് അഖിലേന്ത്യാ ട്രഷററുമായി. ബി ടി രണദിവേക്കുശേഷം സിഐടിയുവിന്റെ പ്രസിഡന്റായി. ആഗോളവൽക്കരണ നയത്തിനെതിരെ ഇന്ത്യൻ തൊഴിലാളിവർഗത്തെ സമരപാതയിലെത്തിക്കുന്നതിന് നേതൃപരമായ പങ്കാണ് അദ്ദേഹം നിർവഹിച്ചത്. വൈദ്യുതിജീവനക്കാരുടെ സംഘടന ദേശീയമായി കെട്ടിപ്പടുത്തത് അദ്ദേഹത്തിന്റെ മുൻകൈയിലായിരുന്നു. സംഘടനയുടെ സ്ഥാപക പ്രസിഡന്റായി. വൈദ്യുതിജീവനക്കാരുടെ ന്യായമായ അവകാശങ്ങൾക്കുവേണ്ടി പ്രവർത്തിക്കുന്ന ഏറ്റവും വലുതും ശക്തവുമായ സംഘടനയാണ് അത്. അവസാനകാലംവരെ അതിന്റെ അഖിലേന്ത്യാ പ്രസിഡന്റായിരുന്നു.

ഉന്നതവിദ്യാഭ്യാസ ബിരുദങ്ങളല്ല, തൊഴിലാളിവർഗ പ്രവർത്തനങ്ങൾക്ക് ഇടയിലുള്ള അനുഭവങ്ങളാണ് ഏറ്റവും വലിയ ജീവിത ബിരുദമെന്ന് സ്വജീവിതംകൊണ്ട് ബോധ്യപ്പെടുത്തിയ നേതാവായിരുന്നു ഇ ബാലാനന്ദൻ

മികച്ച പാർലമെന്റേറിയനുമായിരുന്നു അദ്ദേഹം. 1967മുതൽ 1977വരെ കേരള നിയമസഭാംഗമായി. 1980ൽ ലോക്‌സഭാംഗവും പിന്നീട് രണ്ടുതവണ രാജ്യസഭാംഗവുമായി. തൊഴിലാളിവർഗത്തിന്റെ അവകാശങ്ങൾ നേടുന്നതിനുള്ള സമരവേദിയായി പാർലമെന്റിനെ മാറ്റുന്നതിൽ വിജയംകണ്ട വിപ്ലവകാരിയായ പാർലമെന്റേറിയനായി. അസംഘടിത തൊഴിലാളികൾക്കുവേണ്ടി നിയമം കൊണ്ടുവരുന്നതിന് പാർലമെന്റിൽ ഉയർന്ന ഏറ്റവും ശക്തമായ ശബ്ദമായിരുന്നു അദ്ദേഹത്തിന്റേത്. ഇതുമായി ബന്ധപ്പെട്ട നിയമനിർമാണങ്ങളുടെ ഘട്ടങ്ങളിൽ അദ്ദേഹത്തിന്റെ ഇടപെടൽ ബിൽ അവതരിപ്പിക്കുന്ന മന്ത്രിയുടെയും പ്രധാനമന്ത്രിയുടെയുംവരെ അഭിനന്ദനങ്ങൾക്ക് ഇടയാക്കിയിട്ടുണ്ട്.

ഉന്നതവിദ്യാഭ്യാസ ബിരുദങ്ങളല്ല, തൊഴിലാളിവർഗ പ്രവർത്തനങ്ങൾക്ക് ഇടയിലുള്ള അനുഭവങ്ങളാണ് ഏറ്റവും വലിയ ജീവിത ബിരുദമെന്ന് സ്വജീവിതംകൊണ്ട് ബോധ്യപ്പെടുത്തിയ നേതാവായിരുന്നു ഇ ബാലാനന്ദൻ. ജീവിതപ്രാരാബ്ധങ്ങൾ കാരണം ഏഴാംക്ലാസിൽ പഠിപ്പ് നിർത്തേണ്ടിവന്നു. പക്ഷേ, ഔപചാരിക വിദ്യാഭ്യാസം വേണ്ടവിധത്തിൽ നേടാൻ കഴിഞ്ഞില്ലെന്ന പോരായ്മയെ മറികടന്നുകൊണ്ട് ഇംഗ്ലീഷ് ഉൾപ്പെടെയുള്ള ഭാഷകളിൽ നല്ല പ്രാവീണ്യം നേടാനും ശാസ്ത്രവിഷയങ്ങളിലടക്കം ഉയർന്ന പരിജ്ഞാനം സമ്പാദിക്കാനും സ്വപ്രയത്നത്താൽ കഴിഞ്ഞു. അതുകൊണ്ടാണ് പ്രധാനമന്ത്രിമാരുടെവരെ വാദമുഖങ്ങളെ ഖണ്ഡിച്ച് അനർഗളമായി ഇംഗ്ലീഷിൽ വാദപ്രതിവാദം നടത്താൻ അദ്ദേഹത്തിന് കഴിഞ്ഞത്. ഗഹനമായ വിഷയങ്ങൾപോലും ലളിതമായ ഭാഷയിൽ തൊഴിലാളികൾക്കും സാധാരണക്കാർക്കും മനസ്സിലാകുംവിധം അവതരിപ്പിക്കുന്നതിൽ പ്രത്യേക വൈഭവമുണ്ടായിരുന്നു. പറയേണ്ട കാര്യങ്ങൾ, നന്നായി പഠിച്ച് ഉറപ്പിച്ച് അവതരിപ്പിക്കുന്ന രീതിയായിരുന്നു. മാർക്സിസ്റ്റ് സംവാദത്തിന്റെ എഡിറ്ററായി അവസാനകാലത്ത് പ്രവർത്തിച്ചു. ഓരോ വിഷയത്തെയും മാർക്സിസ്റ്റ് ലെനിനിസ്റ്റ് പ്രത്യയശാസ്ത്രത്തിന്റെ അടിസ്ഥാനത്തിൽ വിശകലനംചെയ്യുന്നതിൽ അസാമാന്യപാടവമുണ്ടായിരുന്നു. മനസ്സിലാക്കിയ കാര്യങ്ങൾ തനതായ ശൈലിയിൽ അവതരിപ്പിക്കുകയുംചെയ്തു.
ഇന്ത്യൻ തൊഴിലാളിവർഗത്തിന്റെ സമരപോരാട്ടങ്ങളിൽ നിശ്ചയദാർഢ്യത്തോടെ നിലയുറപ്പിച്ച ഇ ബാലാനന്ദന്റെ സ്മരണ പുതുക്കുന്ന ഈ ഘട്ടത്തിൽ, രാജ്യത്തെ കർഷകരും തൊഴിലാളികളും വലിയ വെല്ലുവിളികളെ നേരിടുകയാണ്. കോർപറേറ്റുകൾക്ക് സൗകര്യമൊരുക്കാനുള്ള തന്ത്രങ്ങളാണ് മോഡി സർക്കാർ മെനയുന്നത്. രാജ്യവും ലോകവുമെല്ലാം സമാനതകളില്ലാത്ത പ്രതിസന്ധികളാണ് കോവിഡ്മൂലം നേരിടുന്നത്.

കേന്ദ്രസർക്കാരിന്റെ ജനവിരുദ്ധ, തൊഴിലാളിവിരുദ്ധ നയങ്ങൾക്കെതിരെ ഫെബ്രുവരി 23, 24 തീയതികളിലായി നടക്കുന്ന പണിമുടക്ക്‌ വിജയിപ്പിക്കാൻ എല്ലാ പ്രവർത്തകരും രംഗത്തിറങ്ങണം. യോജിച്ചു നിന്നാൽ ബിജെപിയെ മുട്ടുകുത്തിക്കാൻ കഴിയും.

ഒമിക്രോണിന്റെ വരവോടെ ഇന്ത്യ മൂന്നാം തരംഗഭീഷണിയിലാണ്‌. എന്നാൽ, ഇന്ത്യയിൽ കോവിഡിന്റെ മറവിൽ രാജ്യത്തെ വിറ്റുതുലയ്ക്കാനാണ് മോഡി സർക്കാർ ശ്രമിച്ചത്. ദരിദ്രരെ സഹായിക്കുന്നതിനുപകരം വിവിധ പാക്കേജുകൾ അവതരിപ്പിച്ച് കോർപറേറ്റുകൾക്ക് സഹായമൊരുക്കി. പൊതുമേഖലാസ്ഥാപനങ്ങളും നവരത്ന കമ്പനികളും പ്രകൃതിവിഭവങ്ങളുമെല്ലാം കോർപറേറ്റ് കൊള്ളയ്ക്ക് വിട്ടുകൊടുത്തു. ഇത്തരം നീക്കങ്ങൾക്കെതിരെ ശക്തമായ തിരിച്ചടി നൽകേണ്ട സമയം അതിക്രമിച്ചു. കേന്ദ്രസർക്കാരിന്റെ ജനവിരുദ്ധ, തൊഴിലാളിവിരുദ്ധ നയങ്ങൾക്കെതിരെ ഫെബ്രുവരി 23, 24 തീയതികളിലായി നടക്കുന്ന പണിമുടക്ക്‌ വിജയിപ്പിക്കാൻ എല്ലാ പ്രവർത്തകരും രംഗത്തിറങ്ങണം. യോജിച്ചു നിന്നാൽ ബിജെപിയെ മുട്ടുകുത്തിക്കാൻ കഴിയും. അതിനുള്ള ഉദാഹരണമാണ്‌ കർഷക സമരത്തിന്റെ അത്യുജ്വല വിജയം. അഞ്ചു സംസ്ഥാനത്ത്‌ നടക്കുന്ന നിയമസഭാ തെരഞ്ഞെടുപ്പിൽ എൻഡിഎയ്‌ക്ക്‌ വൻതിരിച്ചടിയുണ്ടാകുമെന്നുറപ്പാണ്‌.

ദേശീയമായി ഇരുണ്ട അന്തരീക്ഷത്തിലും ബദൽ രാഷ്ട്രീയത്തിന്റെ പ്രകാശം പരത്തുന്നത് കേരളത്തിലെ എൽഡിഎഫ് സർക്കാരാണ്. പിണറായി വിജയൻ നേതൃത്വം കൊടുക്കുന്ന ഈ സർക്കാർ നാടിന്റെ വികസനത്തിനും ജനതയുടെ ക്ഷേമത്തിനും ഉറച്ച ചുവടുവയ്പുകളാണ് നടത്തുന്നത്. മുൻകാലങ്ങളിലെ വികസന മുരടിപ്പുകൾ തട്ടിനീക്കി അതിവേഗം മുന്നോട്ടു കുതിക്കുകയാണ്‌ നമ്മുടെ നാട്‌. അതേസമയം, എല്ലാത്തിനെയും എതിർക്കുകയെന്ന ശൈലി കോൺഗ്രസും ബിജെപിയും തുടരുകയാണ്‌. സർക്കാർ കൊണ്ടുവരുന്ന ഏതു വികസന പ്രവർത്തനത്തെയും കണ്ണുമടച്ച്‌ എതിർക്കുകയെന്ന ശൈലി കോൺഗ്രസും ബിജെപിയും ഉപേക്ഷിക്കണം. കൂടുതൽ വികസനപ്രവർത്തനങ്ങളുമായി മുന്നേറുന്ന രണ്ടാം പിണറായി സർക്കാരിന്‌ കരുത്തുപകരണം.

ലോകമാകെ ഇടതുപക്ഷ–- കമ്യൂണിസ്‌റ്റ്‌ പ്രസ്ഥാനം കരുത്താർജിക്കുകയാണ്‌. ഇന്ത്യയിലും കർഷക–-തൊഴിലാളി ഐക്യം കൂടുതൽ സംസ്ഥാനങ്ങളിൽ വ്യാപിക്കുന്നു. സാധാരണക്കാരനുവേണ്ടി പ്രവർത്തിക്കുന്ന ജനകീയ സർക്കാർ വരണമെന്ന്‌ ജനത ആഗ്രഹിക്കുന്നു. കേന്ദ്രത്തിലെ ബിജെപി ഭരണത്തിന്റെ അമിതാധികാര വാഴ്ചയെയും വെറുപ്പിന്റെ രാഷ്ട്രീയത്തെയും പ്രതിരോധിക്കാൻ ഇടതുപക്ഷം കരുത്താർജിക്കണമെന്ന ബോധം രാജ്യത്ത്‌ ശക്തമാണ്. അതിനായി പ്രതിബദ്ധതയോടെയുള്ള പ്രവർത്തനങ്ങൾക്ക് ഇ ബാലാനന്ദൻസ്മരണ ഊർജമേകും.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..




----
പ്രധാന വാർത്തകൾ
-----
-----
 Top