ന്യൂനമര്ദ്ദം: മത്സ്യത്തൊഴിലാളികള്ക്ക് ജാഗ്രതാ നിര്ദേശം
തിരുവനന്തപുരം > ഇന്ത്യന് മഹാസമുദ്രത്തിന്റെ ഭൂമധ്യരേഖാ പ്രദേശത്തും അതിനോട് ചേര്ന്നുള്ള തെക്കു പടിഞ്ഞാറന് ബംഗാള് ഉള്ക്കടലിലും ശ്രീലങ്കയുടെ തെക്കുകിഴക്കുമായി വ്യാഴാഴ്ച്ചയോട് കൂടി ഒരു ന്യൂനമര്ദ്ദം രൂപംകൊണ്ടു വരുന്നതായി കേന്ദ്ര കാലാവസ്ഥാനിരീക്ഷണ കേന്ദ്രം അറിയിച്ചു. വ്യാഴാഴ്ച്ച (25/04/2019) മുതല് ഇന്ത്യന് മഹാസമുദ്രത്തിന്റെ ഭൂമധ്യരേഖാ പ്രദേശത്തും അതിനോട് ചേര്ന്നുള്ള തെക്കു പടിഞ്ഞാറന് ബംഗാള് ഉള്ക്കടലിലും കാറ്റിന്റെ വേഗത മണിക്കൂറില് 30 മുതല് 40 കിലോമീറ്റര് വരെയാവാനും വെള്ളിയാഴ്ച്ച കാറ്റിന്റെ വേഗത മണിക്കൂറില് 40 മുതല് 50 കിലോമീറ്റര് വരെയാവാനും ശനിയാഴ്ച്ച കാറ്റിന്റെ വേഗത മണിക്കൂറില് 60 മുതല് 70കിലോമീറ്റര് വരെയാവാനും ഞായറാഴ്ച്ച കാറ്റിന്റെ വേഗത മണിക്കൂറില് 80 മുതല് 90കിലോമീറ്റര് വരെയും തമിഴ്നാട് തീരത്ത് കാറ്റിന്റെ വേഗത മണിക്കൂറില് 40 മുതല് 50കിലോമീറ്റര് വരെയാവാനും സാധ്യതയുണ്ടെന്ന് കേന്ദ്ര കാലാവസ്ഥാനിരീക്ഷണ കേന്ദ്രം അറിയിച്ചു. മത്സ്യത്തൊഴിലാളികള് ശനിയാഴ്ച്ച മുതല് ഇന്ത്യന് മഹാസമുദ്രത്തിന്റെ ഭൂമധ്യരേഖാ പ്രദേശത്തും അതിനോട് ചേര്ന്നുള്ള തെക്ക് പടിഞ്ഞാറന് ബംഗാള് ഉള്ക്കടലിലും, തമിഴ്നാട് തീരത്തും ഈ കാലയളവില് മത്സ്യബന്ധനത്തിന് പോകരുത്. കടല് പ്രക്ഷുബ്ധമോ അതിപ്രക്ഷുബ്ധമോ ആകാന് സാധ്യതയുള്ളതിനാല് ആഴ കടലില് മത്സ്യബന്ധനത്തില് ഏര്പ്പെട്ടിരിക്കുന്നവര് ശനിയാഴ്ച്ച അതിരാവിലെ 12 മണിയോടെ തന്നെ ഏറ്റവും അടുത്തുള്ള തീരത്തെത്തി ചേരണമെന്ന് സംസ്ഥാന ദുരന്ത നിവാരണ അതോറിറ്റി അഭ്യര്ത്ഥിച്ചു. കേരളത്തിന് തിരമാല ജാഗ്രത 25-04-2019 രാത്രി 11.30 വരെ തീരത്ത് 1.5മീറ്റര് മുതല് 2.2 മീറ്റര് ഉയരത്തില് തിരമാലകള് ഉണ്ടാകുവാന് സാധ്യതയുണ്ട്. ആയതിനാല്, പ്രസ്തുത പ്രദേശങ്ങളില് ഈ കാലയളവില് കടല് പ്രക്ഷുബ്ദമാകാന് സാധ്യതയുണ്ട്. Read on deshabhimani.com