മൂന്നാഴ്‌ചകൂടി മഴ തുടരും ; കാൽനൂറ്റാണ്ടിനിടയിലെ കനത്ത മഴ
തിരുവനന്തപുരം മൂന്നാഴ്‌ചകൂടി മഴ തുടരുമെന്ന്‌ കാലാവസ്ഥാ നിരീക്ഷണ കേന്ദ്രം. രാജ്യത്ത്‌ കാൽനൂറ്റാണ്ടിനിടെ ഏറ്റവും ശക്തമായ കാലവർഷമാണിത്‌. രാജ്യത്താകമാനം ഇതുവരെ 10 ശതമാനം അധിക മഴ ലഭിച്ചു. കേരളത്തിൽ 14 ശതമാനവും. ജൂൺ ഒന്നു മുതൽ സെപ്‌തംബർവരെയാണ്‌ കാലവർഷം. എന്നാൽ, ഇക്കുറി കാലവർഷം ഒക്ടോബർ പകുതി കടക്കുമെന്നാണ്‌ റിപ്പോർട്ട്‌. ഗുജറാത്ത്‌ തീരത്ത്‌ രൂപംകൊണ്ട ന്യൂനമർദമാണ്‌ കാലവർഷത്തിന്റെ പിന്മാറ്റം വൈകിക്കുന്നത്‌. ഒക്ടോബർ അവസാനത്തോടെയാണ്‌ തുലാവർഷം ആരംഭിക്കേണ്ടത്‌. ഒരാഴ്‌ച വൈകി ജൂൺ എട്ടിനാണ്‌ കേരളത്തിൽ കാലവർഷമെത്തിയത്‌. ജൂണിൽ 33 ശതമാനം മഴക്കുറവുണ്ടായി. എന്നാൽ ആഗ്‌സതിലെ മഴക്കുറവ്‌ നികത്തി ഇടുക്കി, വയനാട്‌ ഒഴികെയുള്ള ജില്ലകളിൽ ഇപ്രാവശ്യം അധിക മഴ ലഭിച്ചു. വെള്ളിയാഴ്‌ചവരെ കേരളത്തിൽ വ്യാപകമായ മഴയ്‌ക്ക്‌ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. വെള്ളിയാഴ്‌ച ഇടുക്കി, മലപ്പുറം ജില്ലകളിൽ മഞ്ഞ അലർട്ട്‌ പ്രഖ്യാപിച്ചിട്ടുണ്ട്‌. Read on deshabhimani.com