ഗെയിമിങ്ങില് ആപ്പിള് ‐ ഗൂഗിള് പോര്
ആപ്പിളിന് വെല്ലുവിളി ഉയര്ത്തി ഗൂഗിളിന്റെ പുതിയ സേവനം വരുന്നു. ആപ്പിള് ആര്ക്കേഡ് എന്ന വീഡിയോ ഗെയിം സേവനത്തിനു സമാനമായി ഗൂഗിള് പ്ലേ പാസ് എന്ന പേരില് പുതിയ സേവനം ഉടന് എത്തുമെന്ന് കമ്പനി അറിയിച്ചു. ഏകദേശം സമയമായി എന്ന അടിക്കുറിപ്പോടെയാണ് ട്വിറ്ററിലൂടെ ഗൂഗിള് പുതിയ പ്രഖ്യാപനം നടത്തിയത്. കഴിഞ്ഞ കുറച്ച് മാസമായി ഗൂഗിള് വീഡിയോ ഗെയിം സബ്സ്ക്രിപ്ഷന് സേവനം ഒരുക്കാനായുള്ള പ്രവര്ത്തനത്തിലായിരുന്നു. ജൂലെെയില് അതിന്റെ പരീക്ഷണം ഗൂഗിള് പ്ലേ സ്റ്റോറില് നടത്തിയെന്നും റിപ്പോര്ട്ടുണ്ടായിരുന്നു. പുതിയ സേവനത്തിലൂടെ നൂറുകണക്കിനു പ്രീമിയം ആപ്പുകള് ഉപയോഗിക്കാന് വഴിയൊരുക്കുമെന്ന് ഗൂഗിള് അവകാശപ്പെടുന്നത്. 10 ദിവസത്തെ ട്രയലിനുശേഷം പ്രതിമാസം 360 രൂപയാണ് ഗൂഗിള് പ്ലേ പാസിനായി ഈടാക്കുക. ആപ്പിള് ആര്ക്കേഡും ഏകദേശം ഇതേ തുക തന്നെയാണ് ഈടാക്കുന്നത്. എന്നാല്, സെപ്തംബര് 19ന് പുറത്തിറങ്ങുന്ന ആപ്പിള് ആര്ക്കേഡില് പരസ്യങ്ങളുണ്ടാകില്ല. ആപ്പിളിന് വെല്ലുവിളിയായി എത്തുന്ന ഗൂഗിളിന്റെ പ്ലേ പാസിന്റെ കൂടുതല് വിവരങ്ങള് പുറത്ത് വന്നിട്ടില്ല. Read on deshabhimani.com