വയലിൽ മേയുകയായിരുന്ന ആടിനെ കടുവ കൊന്നു
ബത്തേരി നൂൽപ്പുഴ പുത്തൂരിൽ വയലിൽ മേഞ്ഞുകൊണ്ടിരുന്ന ആടിനെ കടുവ കൊന്നു. മണിമുണ്ട കോളനിയിലെ കുള്ളന്റെ ഒരുവയസ്സുള്ള ആടിനെ തിങ്കൾ പകൽ രണ്ടിനാണ്‌ കടുവ കൊന്നത്‌. കുള്ളന്റെ മകൻ ശിവൻ ആടുകളെ മേയ്‌ക്കുന്നതിനിടെയാണ്‌ രണ്ട്‌ കടുവകൾ ഒന്നിച്ചെത്തി ആട്ടിൻകൂട്ടത്തെ ആക്രമിച്ചത്‌. കടുവയുടെ കടിയേറ്റ ആട്‌ തൽക്ഷണം ചത്തു. ശിവൻ ബഹളംവച്ചതോടെയാണ്‌ കടുവകൾ കാട്ടിലേക്ക്‌ മറഞ്ഞത്‌. ബത്തേരി റെയ്‌ഞ്ച്‌ വനത്തിനോട്‌ ചേർന്ന പ്രദേശമാണ്‌ പൂത്തൂർ. വിവരം അറിയിച്ചിട്ടും യഥാസമയം വനപാലകരെത്തിയില്ലെന്ന പരാതിയുമുണ്ട്‌. Read on deshabhimani.com