ശ്രദ്ധേയം ഈ അങ്കണവാടി
നെടുമങ്ങാട് കുട്ടികൾക്കൊപ്പം ഇനി അപ്പൂപ്പനും അമ്മൂമ്മയ്ക്കും അങ്കണവാടിയിൽ പോകാം. കഥ പറയാം കൂട്ടുകൂടാം. നെടുമങ്ങാട് ബ്ലോക്ക് പഞ്ചായത്താണ് വ്യത്യസ്തമായ ആശയം അങ്കണവാടികളിൽ നടപ്പാക്കുന്നത്. കുട്ടികൾ, കൗമാരക്കാർ, വയോജനങ്ങൾ എന്നിവർക്ക് പരിഗണന നൽകുന്ന വിധത്തിലാണ് 3 -ജി അങ്കണവാടികൾ നടപ്പാക്കുന്നത്. ഇത്തരത്തിലുള്ള ആദ്യ അങ്കണവാടി പനവൂർ പഞ്ചായത്തിൽ ബ്ലോക്ക് പഞ്ചായത്ത് പ്രസിഡന്റ് വി അമ്പിളി ഉദ്ഘാടനം ചെയ്തു. കുട്ടികളുടെയും മുതിർന്നവരുടെയും ആരോഗ്യ സംരക്ഷണം, മാനസിക ഉല്ലാസം എന്നിവ പദ്ധതിയിലൂടെ ഉറപ്പാക്കും. കൗമാര പ്രായക്കാർക്കായുള്ള വിവരവിജ്ഞാന കേന്ദ്രമായും അങ്കണവാടികള് പ്രവർത്തിക്കും. വിവിധ ഇ- സേവനങ്ങളും ലഭ്യമാകും. കംപ്യൂട്ടർ, ഇന്റർനെറ്റ്, പ്രിന്റർ സൗകര്യങ്ങളും സജ്ജീകരിച്ചിട്ടുണ്ട്. വിദ്യാർഥികൾക്കും മത്സര പരീക്ഷകൾക്ക് തയ്യാറെടുക്കുന്ന ഉദ്യോഗാർഥികൾക്കും ഈ സൗകര്യം പ്രയോജനപ്പെടുത്താനാകും. മുതിർന്ന വ്യക്തികളുടെ ആരോഗ്യ പ്രശ്നങ്ങൾ കൃത്യമായി നിരീക്ഷിക്കാനും ജീവിതശൈലീരോഗ നിർണയത്തിനുള്ള സൗകര്യവും ഇവിടെയുണ്ട്. പൾസ് ഓക്സിമീറ്റർ, ഗ്ലൂക്കോമീറ്റർ, ഹേമറ്റോ മീറ്റർ തുടങ്ങിയവയുമുണ്ട്. നെടുമങ്ങാട് ബ്ലോക്ക് പഞ്ചായത്തിന്റെ വാർഷിക പദ്ധതിയിൽ ഉൾപ്പെടുത്തിയാണ് 3 ജി അങ്കണവാടികൾ നിർമിച്ചത്. ഓരോ പഞ്ചായത്തിലെയും തെരഞ്ഞെടുത്ത ഒരു അങ്കണവാടിക്ക് രണ്ട് ലക്ഷം രൂപയാണ് പദ്ധതി നടപ്പാക്കാനായി വകയിരുത്തിയിരിക്കുന്നത്. Read on deshabhimani.com