റോഡ് നവീകരണത്തിന് ഭൂമി ഏറ്റെടുക്കാൻ ഉത്തരവായി
ഫറോക്ക് പുതിയ പാലം മുതൽ പഴയപാലം വരെ ഫറോക്ക് ടൗണിനെ കൂട്ടിയണക്കിയുള്ള ഓൾഡ് എൻഎച്ച് വീതി കൂട്ടി നവീകരിക്കുന്നതിനും , ചെറുവണ്ണൂർ - കൊളത്തറ റോഡിനും ഭൂമി ഏറ്റെടുക്കുവാൻ സർക്കാർ ഉത്തരവായതായി മന്ത്രി പി എ മുഹമ്മദ് റിയാസ് അറിയിച്ചു. ദേശീയപാതയേയും ഫറോക്ക് ടൗണിനേയും കൂട്ടിയിണക്കുന്ന പ്രധാന പാത 20 മീറ്ററാക്കി വീതി വർധിപ്പിച്ച് ആധുനിക രീതിയിൽ നവീകരിക്കുന്നതിനുള്ള അലൈൻമെന്റിന് നേരത്തേ അംഗീകാരമായിരുന്നു. ഇതിനാവശ്യമായ 7.2 കോടി രൂപയും അനുവദിച്ചിട്ടുണ്ട് . റോഡ് വീതി കൂട്ടുന്നതിനാവശ്യമായ സ്ഥലം ഏറ്റെടുക്കുന്നതിനാണിപ്പോൾ സർക്കാർ അനുമതിയായത്. ഈ റോഡിന്റെ നവീകരണം പൂർത്തിയാകുന്നതോടെ ഫറോക്ക് ടൗണിന്റെ മുഖഛായ മാറുന്നതിനൊപ്പം ഗതാഗതക്കുരുക്കിനും പരിഹാരമായേക്കും. ചെറുവണ്ണൂർ -കൊളത്തറ റോഡിനായി ഏറ്റെടുക്കുവാൻ ബാക്കിയുള്ള സ്ഥലമെടുപ്പിനാണ് പുതിയ ഉത്തരവ്. ഇരു റോഡുകളുടേയും സ്ഥലമെടുപ്പ് നടപടികൾ ത്വരിതപ്പെടുത്തി പദ്ധതി അതിവേഗം പൂർത്തീകരിക്കുന്നതിന് നിർദേശം നൽകിയതായി മന്ത്രി അറിയിച്ചു. Read on deshabhimani.com