വാടപ്പുറം ബാവ ആദരിക്കപ്പെടേണ്ട ചരിത്രനായകൻ : ജി സുധാകരൻ
ആലപ്പുഴ സാമ്പത്തികരംഗത്തെ വർഗ സമരത്തിന് മുൻകൈയെടുത്ത വാടപ്പുറം ബാവ ആദരിക്കപ്പെടേണ്ട ചരിത്രനായകനെന്ന് മുൻ മന്ത്രി ജി സുധാകരൻ . തിരുവിതാംകൂർ ലേബർ അസോസിയേഷന്റെ ശതാബ്ദി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. വാടപ്പുറം ബാവ സ്ഥാപിച്ച തിരുവിതാംകൂർ ലേബർ അസോസിയേഷനിൽ നിന്ന് ആവേശം ഉൾക്കൊണ്ടാണ് പുന്നപ്ര–- വയലാർ സമരം പോലും ഉണ്ടായത്. ചൂഷിതവിഭാഗത്തിൽ നിന്ന് ഉയർന്നുവന്ന അയ്യൻകാളിയും, വാടപ്പുറം ബാവയും ആറാട്ടുപുഴ വേലായുധപ്പണിക്കരുമടക്കമുള്ളവർ ചരിത്രത്തിലെ ഹീറോകളാണെന്നും സുധാകരൻ പറഞ്ഞു. ഇന്ത്യൻ കമ്യൂണിസ്റ്റ് പാർടി രൂപംകൊണ്ട 1920 ലാണ് ബാവ തിരുവിതാംകൂർ ലേബർ അസോസിയേഷൻ രൂപീകരിച്ചത്. 1934 ൽ മാത്രമാണ് തിരുവിതാംകൂറിൽ ട്രേഡ് യൂണിയൻ ആക്ട് നിലവിൽ വരുന്നത് പോലും–-സുധാകരൻ പറഞ്ഞു. ചരിത്ര സെമിനാർ ഇന്ത്യൻ കൗൺസിൽ ഓഫ് ഹിസ്റ്റോറിക്കൽ റിസേർച്ച് അംഗം ഡോ. സി ഐ ഐസക്ക് ഉദ്ഘാടനം ചെയ്തു. ഫൗണ്ടേഷൻ പ്രസിഡന്റ് സജീവ് ജനാർദനൻ അധ്യക്ഷനായി. കെ സി സുധീർബാബു, വി കമലാസനൻ എന്നിവർ സംസാരിച്ചു. സെക്രട്ടറി പി ഡി ശ്രീനിവാസൻ സ്വാഗതവും വൈസ് പ്രസിഡന്റ് ജാക്സൺ ആറാട്ടുകുളം നന്ദിയും പറഞ്ഞു. Read on deshabhimani.com