ദിഗ്‌വിജയ്‌ സിങ് പറഞ്ഞത്‌ വിഡ്‌ഢിത്തം: രാഹുൽ ഗാന്ധി
ജമ്മു> പാകിസ്ഥാനിൽ സർജിക്കൽ സ്‌ട്രൈക്ക്‌ നടത്തിയെന്ന കേന്ദ്രസർക്കാരിന്റെ അവകാശവാദത്തിന്‌ തെളിവില്ലെന്ന മുതിർന്ന കോൺഗ്രസ്‌ നേതാവ്‌ ദിഗ്‌വിജയ്‌ സിങ്ങിന്റെ പ്രസ്‌താവന വിഡ്‌ഢിത്തമാണെന്ന്‌ രാഹുൽ ഗാന്ധി പറഞ്ഞു. സൈന്യത്തിൽ പൂർണ വിശ്വാസമുണ്ടെന്നും സൈന്യം പൂർത്തിയാക്കിയ ഒരു ദൗത്യത്തിനും തെളിവ്‌ നൽകേണ്ട കാര്യമില്ലെന്നും രാഹുൽ ഗാന്ധി പറഞ്ഞു. ജമ്മു കശ്‌മീരിലെത്തിയ ഭാരത്‌ ജോഡോ യാത്രയുടെ ഭാഗമായ വാർത്താ സമ്മേളനത്തിൽ സംസാരിക്കുകയായിരുന്നു രാഹുൽ. മുതിർന്ന നേതാവിന്റെ പ്രതികരണം വിഡ്‌ഢിത്തമാണെന്ന്‌ പറയുന്നതിൽ ഖേദമുണ്ടെന്നും രാഹുൽ പറഞ്ഞു. തന്റെ പ്രതിച്ഛായ സംഘടിതമായി തകർക്കുന്നതിന്‌ ആയിരക്കണക്കിന്‌ കോടി രൂപയാണ്‌ ബിജെപി ചെലവിട്ടതെന്ന്‌ രാഹുൽ ഗാന്ധി പറഞ്ഞു. സമൂഹമാധ്യമങ്ങളിൽ രാഹുലിനെ പപ്പു എന്ന്‌ വിശേഷിപ്പിക്കുന്നതിനെക്കുറിച്ച്‌ പ്രതികരിക്കുകയായിരുന്നു അദ്ദേഹം. Read on deshabhimani.com